Yaradıcılıq fəaliyyətini qardaş ölkə Türkiyədə davam etdirən azərbaycanlı müğənni Rövşən Civişov Türk mediasının diqqətini cəlb edib.



Belə ki, Türkiyənin nüfuzlu xəbər portalları və qəzetləri R.Civişov haqqında yazılan məqalələri yayımlayıblar.



“Azərbaycan və Türkiyə arasında uzanan musiqi dostluğu” başlığıyla manşetlərdə yer alan məqalələrdə müğənninin bu ilədək gördüyü işlərdən bəhs olunub.



Məqalələrdə R.Civişovun 2010-cu ildə “Unutmaram” adlı ilk musiqi albomunun işıq üzü görməsi, Azərbaycan, Türkiyə, Almaniya, Belçika və başqa ölkələrdə konsert proqramıyla çıxış etməsi qeyd edilib.



Müğənninin belnəlxalq müsabiqələrdə uğurlu iştirakı və qazandığı mükafatları haqqında da məlumat verilib.



Xüsusiylə məqalələrdə Azərbaycanın xalq artisti Flora Kərimova ilə duet oxuması jurnalistlərin maraq dairəsində olub. Müğənnilər “Bu sevgiyə dözüm yox” mahnısını duet şəklində ifa etməklə böyük uğur qazanıblar ki, nəticədə Azərbaycanda “Ən yaxşı duet” nominasiyasıyla mükafatlandırılıblar. Jurnalistlər bunu da əlavə ediblər.



Ümumiyyətlə, Flora Kərimova ilə 3 dueti 12 mahnının yer aldığı alboma daxil olunub.



Jurnalistlər müğənninin yaradıcılıq fəaliyyətini Türkiyə musiqi həyatına davam etdirməsini uğurlu addım hesab ediblər.