№016/FV 09 dekabr 2011-ci il







Mətbuat Xidmətinin



Məlumatı







MQP başqanı “Siyasi Partiyalar Haqqında” yeni Qanunda iqtidarın nəzərdə tutduğu dəyişikliklərə münasibət bildirdi







Vüqar Bəyturan:”Hakimiyyət təkpartiyalı siyasi sistem qurmaq və ölkədə sərt rejim yaratmaq arzusundadır”







Məlum olduğu kimi, “Siyasi Partiyalar Haqqında” yeni Qanunda iqtidarın nəzərdə tutduğu dəyişikliklər barədə ictimai müzakirələrə start verilib. Nəzərdə tutulan dəyişikliklərə münasibət barədə MQP Mətbuat Xidmətinə açıqlama verən MQP başqanı Vüqar Bəyturan bildirib ki, əgər həqiqətən də yeni qanun təsvir olunduğu qədər irticaçı xarakter daşıyırsa, bu o deməkdir ki, hakimiyyət təkpartiyalı sistem qurmaq və ölkədə sərt rejim yaratmaq arzusundadır. “Belə məlum olur ki, qanun bu şəkildə qəbul olunarsa, Azərbaycan hakimiyyəti hər hansı demokratik islahat aparmaq fikrində deyil, əksinə, dünyada baş verən dəyişikliklərə rəğmən, diktatura rejimini möhkəmləndirmək, siyasi sistemdə mövcud olan müxalifət partiyalarını sıradan çıxarmaq qərarındadır”-deyən MQP lideri partiyaların dövlət büdcəsindən maliyyələşdirilməsi üçün bu günə qədər keçirilən hər hansı seçkinin nəticələrinin əsas kimi götürülməsini ədalətsizlik hesab etdiyini vurğulayıb. Onun sözlərinə görə, ölkədə keçirilən seçkilər total saxtalaşdırma ilə müşaiyyət olunduğu üçün həmin seçkilərdə partiyalara yazılan səslər siyasi partiyaların güc nisbətini müəyyən edə bilməz. Vüqar Bəyturan qarşıdan gələn parlament seçkilərinə qədər dövlət qeydiyyatından keçən bütün siyasi təşkilatların bərabərhüquqlu şəkildə maliyyələşdirilməsinə, hamıya bərabər start vəziyyətinin yaradılmasına, yalnız demokratik seçkilərdən sonra dünyada qəbul olunmuş qaydalara müvafiq olaraq parlamentdə təmsil olunan partiyaların dövlət büdcəsindən maliyyələşməsinə tərəfdar olduqlarını bildirib. Qeydiyyat üçün üzvlərin say normasının 5000-ə yüksəldilməsini növbəti antidemokratik dəyişiklik adlandıran MQP başqanı siyasi sistemi iflic edilmiş və əhalisi qeyri-siyasiləşdirilmiş bir ölkədə bu cür dəyişikliyin siyasi özünüifadənin məhdudlaşdırılmasına xidmət etdiyini bəyan edib. Qeydiyyatsız partiyaların siyasi fəaliyyətinə qadağan qoyulmasını nəzərdə tutan növbəti dəyişikliyi şərh edən Vüqar Bəyturan bu yeniliyin əslində iqtidarın siyasi partiyalarla bağlı planını ifşa etdiyini qeyd edib. “Üzvlərin say normasını yüksəltməklə müxalifət mövqeyində duran partiyaları qeydiyyatdan məhrum etmək, sonra isə qeydiyyatsız olduğuna görə siyasi fəaliyyətinə yasaq qoymaq, həmin partiyaların tərəfdarlarını təqib etmək və nəticədə ölkədə sözəbaxan siyasi sistem formalaşdırmaq sözügedən planın mərhələləridir”-söyləyən Milli Qurtuluşçuların lideri beynəlxalq demokratik təsisatları bu planın həyata keçməsinin qarşısını almağa, iqtidarı isə son nəticədə ölkəyə ziyan vuracaq addımlardan çəkinməyə çağırıb.















Mətbuat Xidmətinin



rəhbəri: Kənan Göytürk