Türkiyə Silahlı Qüvvələrinin istefada olan general-leytenantı, tanınmış siyasi-hərbi analitik Haldun Solmaztürkün Milli.Az xəbər portalına müsahibəsi:



- Cəbhə bölgəsində Ermənistan ordusunun atəşkəsi tez-tez pozması müharibə vəziyyətinə gətirib çıxa bilərmi?



- İndiki məqamdakı vəziyyətin müharibə səviyyəsinə qədər gəlib çıxacağına inanmıram. Ermənilərin atəşkəsi sürəkli olaraq pozmaları münaqişə bölgəsində böhran vəziyyətini nəzarətdə saxlamaq üçün şüurlu olaraq edilən siyasi oyunlardır. Vəziyyətin müharibəyə qədər çıxacağına imkan verməzlər. Bu gün bölgədə başqa dövlətlərin maraqları var və onlar müharibənin başlamaması üçün əllərindən gələni edirlər. Həm də Ermənistan siyasətçiləri müharibənin ölkə üçün hansı fəsadlara gətirib çıxaracağını dərk etməmiş deyillər. Müharibə Ermənistan xeyir gətirməyəcək. Ölkənin siyasi durumu ağırdır və Ermənistanı kütləvi etiraz aksiyaları dalğası bürüməkdədir.



- Sizə elə gəlmir ki, Ermənistan hakimiyyətinin atəşkəsi tez-tez pozması ölkənin daxilində baş qaldıran narazılıqlarla bağlıdır?



- Əminliklə deyərdim ki, cərəyan edən hadisələrin məntiqində siz deyək amil durur. Yaxın Şərqdə başlayan inqilab dalğasının Ermənistana təsir edəcəyi şübhəsizdir. Cünki ölkədə yaşanan narazılıqların kökündə iqtisadi, sosail və siyasi problemlər dayanır. Ermənistan hakimiyyəti bu narazılıqlardan çəkindiyi üçün vətəndaşların fikrini daxili siyasətdən yayındırmağın yolunu Azərbaycanla vəziyyəti gərginləşdirməkdə görür. Bu məsələnin görünən və ortada olan tərəfidir.



Ermənistan hakimiyyəti bir şeyi nəzərə almalıdır ki, Azərbaycanla vəziyyəti gərginləşdirməklə, xüsusilə, atəşkəsi pozmaqla ölkə daxili problemlərinin həllini yoluna qoya bilməyəcək.



- Sizcə, baş verə biləcək müharibə sosial-iqtisadi vəziyyəti ağır olan Ermənistan üçün hansı ağır nəticələrə gətirib çıxaracaq?



- Onu deyim ki, müharibə ölkənin vəziyyətinin qısa müddətdə pisləşdirə bilməz. Fikrimcə, Ermənistanın hakimiyyət dairələri daxildəki situasiyanı nəzarətdə saxlamağa, milli birliyə nail olmağa cəhd edəcək. Amma müəyyən zamandan sonra müharibənin ciddi nəticələrin olacağı, həmin nəticələrin Ermənistandakı situasiyanı gərginləşdirəcəyi şübhəsizdir. Başlıca səbəb Ermənistan iqtisadiyyatının zəifliyi, Yerevanın Rusiyadan tam asılılığıdır. Belə olan halda müharibə başlayacağı təqdirdə Yerevandakı iqtidarın hansı vəziyyətə düşəcəyini təsəvvür etmək çətin deyil.

Ermənistan siyasətçiləri vəziyyətin onlar üçün arzuolunmaz durum yaradaçağını dərk edirlər.



- Digər tərəfdən, hazırda Ermənistan hakimiyyətinin Qarabağı azad etməməsi bölgədə müharibə riskini artırırmı?



- Axıhansı dövlət öz torpağının işğal altında qalması ilə razılaşar?! Təbii ki, Azərbaycan da ərazilərinin bir qisminin erməni işğalında olması ilə əsla razılaşan deyil. İndiki proseslər də situasiyanın müharibəyə istiqamətləndiyini göstərir. Üstəlik, danışıqlar prosesi də real nəticə vermir.



Elnur Eltürk