BAGT və DAK Gəncləri Şəhidlərin ruhunu yad etdi

1990-cı il 20 Yanvar Şəhidlərinin anım günü ilə bağlı olaraq Şəhidlər Xiyabanı Dünya Azərbaycanlıları Konqresi Gənclər Təşkilatı və Bütöv Azərbaycan Gənclər Təşkilatının yüzə yaxın fəalı tərəfindən ziyarət olunub. Ziyarət metronun Elmlər Akademiyası stansiyasının qarşısından başladı. Əldə qərənfillər və qanımız bahasına zirvələrdə dalğalandırdığımız bayraqla birlikdə xiyabana daxil olan gənclər Şəhidlərin ruhuna dualar oxudu. Gənclər 20 yanvar Şəhidləri ilə yanaşı 1918-ci ildə Bakıda həlak olmuş Türkiyə türklərinin şərəfinə ucaldılmış abidəni də ziyarət ediblər. Ziyarət iştirakçılarını GünAz TV, Kanal13 Tv və digər mətbuat nümayəndələri müşayiət edirdi. Daha sonra BAGT sədri Ruslan İzzətli və DAK Gənclər Təşkilatının sədri Seymur Həsənli televiziya və mətbuat nümayəndələrinə açıqlama verərək 1990-cı il 20 yanvar tarixinin qürur mənbəyi olduğunu bildiriblər.

BAGT sədri Ruslan İzzətli: “Bir çoxları 20 yanvar tarixini faciə kimi təqdim edir. Amma əslində bu belə deyil. 1990-cı il 20 yanvar Azərbaycanın 70 illik rus əsarətində ölmədiyinin canlı sübutu idi. Azərbaycan türklüyünün qürur duyası bir tarixdir həmin gün.”

DAK Gənclər Təşkilatı sədri Seymur Həsənli: “1990-cı il 20 yanvar hadisələri, “Azərbaycan müstəqilliyini SSRİ-nin dağılması ilə əldə etdi” fikrinin müdafiəçilərinə bir dərsdir. Bu nağıl deyil, faktdır, sübutdur, şanlı tarixdir. Həmin hadisədən sonra Şəhidlərin dəfni üçün Azadlıq meydanından Xiyabana qədər uzanan insan seli göstərdi ki, rus-erməni ordusu nə qədər qəddardırsa Azərbaycan türkü də sona kimi mübarizədədir.