Gürcüstan Respublikasının Qardabani rayonu ərazisində azərbaycanlılara məxsus 970 hektar torpaq sahəsi heç bir hərrac keçirilmədən regiona aidiyyəti olmayan iş adamına satılıb və ərazidə əkin işinə başlanılıb. Ərazilər (Qardabani 100 hektar, Kosalı kəndi 720 hektar və Nəzərli kəndi 150 hektar) tarixən həmin kəndlərin sakinlərinin olub.



Torpaq sahələri son 10 ildə icarə müqaviləsi ilə kənd sakinləri arasında bölünüb və müəyyən olunan icarə haqları vaxtı-vaxtında ödənilib. Ərazinin 300 hektara yaxını otlaq sahəsidir ki, bu da Gürcüstan qanunlarına görə satıla bilməz. Eyni zamanda ölkə qanunvericiliyinə görə torpaq özəlləşdirməsində yerli əhali üstün hüquqa malikdir və qapalı hərraclar keçirilərkən ərazilər yerli əhaliyə təklif olunmalıdır. Əhali torpağı almaqdan imtina edərsə açıq hərraclar təşkil edilməlidir ki, burada da yalnız Gürcüstan vətəndaşları iştirak edə bilərlər. Qeyd olunan prosedur adı çəkilən ərazilərdə kobud şəkildə pozulub. Nə qapalı auksion keçirilib və nə də torpağın satılması ilə bağlı əhaliyə məlumat verilib. “Məxfi” həyata keçirilən satışda on minlərlə soydaşlarımızın hüquqları pozulub. Kənd sakinlərinin yeganə dolanışıq yeri olan torpaqlar məmurlarla iş birliyində olan “işbazlar” tərəfindən mənimsənilib. Bu gizli hərraclar ilk dəfə baş vermir. İndiyə qədər Borçalının Ağtəhlə, Qaracalar, Qaratəhlə və başqa rayon və kəndlərində baş verib. Siyasi və yerli hakimiyyət orqanları vətəndaşların pozulan hüquqlarını ört basdır edib, minlərlə soydaşımızın torpaqları üzərindəki mülkiyyət hüquqlarını kobudcasına pozublar. Ancaq son baş verən təxribat siyasi xarakter daşıyır.



“Borçalı” Cəmiyyətin idarə heyəti baş verən qanun pozuntularını milli azlıqların insan toplumu olaraq hüquq və azadlığına təcavüz kimi dəyərləndirir. Bu işdə məsuliyyəti bir başa Gürcüstan hakimiyyət, o cümlədən əlaqədar nazirlik və komitələr və Kvemo-Kartli qubernatoru David Kirkitadze daşıdığı qənaətindədir. Cəmiyyət saxta hərracların nəticələrinin dərhal ləğv olunmasını və günahkarların dərhal cəzalandırılmasını tələb edir. Bundan başqa həmin kəndlərdə qapalı hərracların keçirilməsi yolu ilə torpaqların ədalətli bölünməsi də tələb olunur. Cəmiyyət soydaşlarımızı təmkinli və öz pozulmuş hüquqlarının bərpası istiqamətində fəal olmağa çağırılır. Əks halda bu proses iki xalq və dövlət arasında arzu olunmaz sonluğa səbəb ola bilər ki, bunun da məsuliyyəti bir başa Gürcüstan dövlətinin üzərinə düşür.



Qaynaq: musavat.com