Bakı, AzerHasret.com, 30.10.2010 – Xəbər verdiyimiz kimi sıralarında Sabir Rüstəmxanlının başçılıq etdiyi Vətəndaş Həmrəyliyi Partiyası və Asim Mollazadənin sədri olduğu Demokratik İslahatlar Partiyasını birləşdirən Demokratiya Blokunun vahid namizədi, tanınmış şair və qələm adamı Əvəz Qurbanlı tərəfdarlarını Azər Həsrətə səs verməyə çağıraraq onu dəstəklədiyini bəyan etmişdi. Bundan bir gün sonra isə dairədən deputatlığa iddia edən və obyektiv səbəblərdən seçki yarışmasından kənarda qalan daha bir namizəd – tanınmış jurnalist, “Təhsil” jurnalının şöbə müdiri və “Aktual” qəzetinin redaktoru Hüseynzadə Əkbər Məhərrəm oğlu da öz tərəfdarlarını ən şansli namizəd Azər Həsrətə səs verməyə çağırıb.



Azər Həsrətlə görüşündə məsələni müzakirə edən Əkbər Hüseynzadə bildirib ki, o, 34 saylı dairənin ən şanslı namizədinin dövlətçiliyə və milli maraqlara xidmət etməsini, mövqeyində prinsipial, açıq və ardıcıl olmasını nəzərə alaraq tərəfdarlarını məhz bu mövqeyə dəstək olmağa çağırıb. Eyni zamanda Əkbər Hüseynzadə bildirib ki, artıq dairə ərazisində və ölkənin ictimai-siyasi çevrələrində Azər Həsrətin bu dairədən deputat seçiləcəyi haqda fikirlər birmənalı şəkildə möhkəmlənib.



“Mən bilirəm ki, Azər Həsrət heç bir çətinlik çəkmədən bu dairənin qalibi olacaq. Üstəlik onun intellektual imkanlarının digər namizədlərlə müqayisədə xeyli yüksək olması, ölkə içində və xaricdə, türk dünyasında tanınması və geniş əlaqələr şəbəkəsinin varlığı belə bir insanın ən dəyərli və dövlət üçün gərəkli millət vəkili olacağına imkan verir. Əlbəttə ki, düşüncəli insanlar məhz belə bir namizədin üzərində seçim etməlidir”, – deyə Əkbər Hüseynzadə bildirib.



Xatırladaq ki, Əkbər Hüseynzadə 2005-ci ildə də 34 saylı Xətai II seçki dairəsindən deputatlığa namizəd olub və ərazinin ictiamiyyəti tərəfindən kifayət qədər dəstəyə malikdir.