Bakı, AzerHasret.com, 24.10.2010 – Bu gün günün ikinci yarısı, saat 17.00-19.00 arası 34 saylı Xətai II seçki dairəsindən deputatlığa müstəqil namizəd Azər Həsrət seçicilərlə görüşlər çərçivəsində ilk açıq hava toplantısını gerçəkləşdirəcək. Görüş Mehmandarov küçəsindəki 12-ci və 14-cü binaların həyətindəki meydanda (94 saylı MİS-in önü) gerçəkləşəcək. Əsasən yaxın binalarda yaşayan sakinlərin iştirak edəcəyi görüşə ciddi hazırlıq görülüb. Həmin görüşdə namizəd özünün seçki platformasını açıqlamaqla bərabər seçicilərin fikirlərini də dinləyəcək.



Azər Həsrətin seçki qərargahından verilən xəbərə görə, 34 saylı Xətai II seçki dairəsinin ən iddialı namizədi bu görüşə və ümumilikdə seçicilərlə təmaslara böyük önəm verir: “Mən hər bir seçicinin ayağına getməyi özümə borc və şərəf bilirəm. Tanrının yardımı və seçicilərin iradəsilə millət vəkili seçildikdən sonra da daim onların arasında olacaq və hər bir dərdlərinə ortaqlıq etməyə çalışacağam. Mən mandatını alıb beş il ərzində ərazidə gözə dəyməyən deputatlardan olan deyiləm. Ona görə də bu günkü açıq hava görüşünə üzüağ və həvəslə çıxıram”.



Onu da əlavə edək ki, bu gün Azər Həsrət həm də İctimai TV-nin efirində (www.itv.az) canlı efirdə çıxış edəcək. Çıxış saat 21.00-23.00 arası üçün nəzərdə tutulub.