Dünyaxanım Əliyeva: "Bu gün Türkiyədə müəyyən qurumlar gecə-gündüz sərhədlərin açılması üçün çalışırlar..."



Ermənistanın "Tert.am" saytının Türkiyənin "Gazeteport.com.tr" saytına istinadla yaydığı məlumata görə, yaxın vaxtda Türkiyə ilə Ermənistan birgə aviasiya şirkəti yaradacaq. Bu məlumat Türkiyənin Van vilayəti Ticarət və Sənaye Odasının başqanı Zahir Qandaşoğlunun açıqlaması əsasında hazırlanıb. Məlumata görə, Qandaşoğlu bildirib ki, müştərək şirkətin yaradılması təşəbbüsü Ermənistanda fəaliyyət göstərən şirkətlərin birindən gəlib. Məlumata görə, Qandaşoğlu bildirib ki, müştərək şirkətin yaradılması təşəbbüsü Ermənistanda fəaliyyət göstərən şirkətlərin birindən gəlib. O, həmin şirkətin adını çəkməyib. Ticarət və Sənaye Odası başqanının sözlərinə görə, hazırda müzakirələr gedir və müştərək aviasiya şirkətinin "Eri-Van" adlandırılması nəzərdə tutulur.

"Bu gün Türkiyədə müəyyən qurumlar gecə-gündüz sərhədlərin açılması üçün çalışırlar. Onların bütün bu istiqamətdə fəaliyyətləri fiaskoya uğrayacaq", bu fikirləri mediaya açıqlamasında Dünya Azərbaycanlıları Konqresi Qadınlar Şurasının sədri Dünyaxanım Əliyeva bildirdi: "Ermənistanla sərhədlərin açılması qeyri-mümkündür. Türkiyənin ictimai-siyasi vəziyyəti buna imkan vermir. Bir neçə gün bundan öncə Millətci Hərəkat Partiyasının başqanı Dövlət Bahçalının Ermənistanla sərhədə gəlməsi Ermənistana və onun arxasında duranlara yaxşı bir zərbə oldu. İndi də hansısa şirkətin belə bir təşəbbüs göstərməsi hər iki ölkədə ciddi müqavimətlə qarşılanacaq. Türkiyənin nüfuzlu şirkəti erməni gözəlini "birinci" elan edirsə, bunlar hamısı ictimaiyyəti "barışığa" hazırlamaq məqsədi daşıyır. Təəssüfləndiricidir ki, Türkiyədə belə şirkətlər tapılır ki, ermənilərlə barışıq yaratmaq istəyirlər. Bunlar hamısı ABŞ və qərbin sərhəd açılımı ilə bağlı strategiyasının tərkib hissəsidir. Nəzərə almaq lazımdır ki, Ermənistan nə Azərbaycan torpaqlarını azad edib, nə də ki, Türkiyəyə qarşı ərazi iddialarından geri çəkilib. Belə olan halda hansı məqsədlərlə Ermənistanla əlaqələr qurulmaldır?!"



Elnur Eltürk