30 iyul 2010-cu il tarixdə Dünya Azərbaycanlıları Konqresi Gənclər Təşkilatı olaraq altı nəfərlik heyətlə Gəncə, Tovuz, Qazax regionlarına səfər gerçəkləşdirdik. Səfər müddətində gənclər, ziyalılar və müxtəlif icra strukturlarının nümayəndələri ilə görüşlər keçirilmişdir.

Gəncə şəhərinə səfər müddətində ilk görüş “Reallıq” qəzetinin mərkəzi ofisində gənclərlə gerçəkləşdi. Virtual aləmdən təşkilatla əməkldaşlıq edən gənclərlə görüş zamanı təşkilatın məqsədi, fəaliyyəti, Gəncədə həyata keçiriləcək işlər barədə danışıqlar aparıldı. Bundan başqa “Reallıq” qəzetinin təsisçisi və baş redaktoru İkram Rafiqoğlu ilə görüş oldu. Görüş ərzində informasiya sahəsində əməkdaşlığa dair müxtəlif müzakirlər getdi. Gəncə şəhərinə işgüzar səfər zamanı Azərbaycan Yazıçılar və Jurnalistlər Birliyinin üzvü Əlvan Kəbirli və Gəncə Dövlət Universitetinin dosenti Rəşid Məhərrəmli ilə də görüş olmuşdur. Gəncədə müxtəlif siyasi və dini qüvvələrin fəaliyyəti müzakirə olunmuş, təşkilatımızın həyata keçirdiyi işlər və məlum səfəri ziyalılar tərəfindən yüksək qiymətləndirilmişdir. Gəncə səfəri şəhər İcra Hakimiyyətinin nümayəndəsi Elçin Veysov ilə görüşlə yekunlaşmışdır. Görüş zamanı Gəncədə həyata keçiriləcək işlər, bu işin sistemi, İcra Hakimiyyətinin və digər dövlət strukturlarının dəstəyi kimi məsələlər müzakirə olunmuşdur.

Tovuz şəhərinə səfər zamanı hələ uzun müddətdir qiyabi şəkildə əməkdaşlıq olunan Aşıq Hüseyn Bozalqanlı adına “Varislər” Ədəbi Birliyi ilə görüş keçirilmişdir. Görüşün təşkilatçısı DAK Gənclər Təşkilatının Tovuz şəhər təmsilçisi Gülnar Səma idi. İştirakçılar Tovuz şəhərinin müxtəlif kəndlərinin müəllimləri, yazıçılar və şairlər idi. Yeni Nəfəs qəzeti ilə əməkdaşlığın qurulması, gələcəkdə daha böyük tədbirlərin keçirilməsi, məktəblərdə təbliğat kompaniyasının inkişaf etdirilməsi kimi məsələlər ətrafında fikir mübadiləsi aparılmışdır.

Səfər Qazax rayonuna qeyri-rəsmi ziyarətlə yekunlaşmışdır.

Qeyd edək ki, bir həftə müddətində gerçəkləşən səfərdə DAK Gənclər Təşkilatının İdarə Heyətinin üzvləri Orxan Əlirzayev, Əfqan Həsənov, üzvləri Çingiz Qəribov, Eşqin Veysov, Nəriman Əliyev iştirak etmişdir.



Seymur Həsənli

DAK Gənclər Təşkilatının sədri