Məlum olduğu kimi Dünya Azərbaycanlıları Konqresi Gənclər Təşkilatı Gəncə-Tovuz-Qazax istiqamətində Qərb regionlarına səfərə çıxmışdır. Məqsəd Gənclər Təşkilatının təmsilçiliklərinin formalaşdırılması, müxtəlif səpkili görüşlərin təşkil olunması idi. İlk görüş Gəncə şəhərində gerçəkləşdi.

Belə ki, virtual aləmdən təşkilatla əməkdaşlıq edən, Yeni Nəfəs qəzetinin yayımında fəal iştirak edən gənclərlə görüş keçirildi. “Reallıq” qəzetinin mərkəzi ofisində həyata keçirilən görüşdə təşkilatın başqanı Seymur Həsənli bir çoxları kimi dildə deyil, əməli cəhətdən görülmüş işlər haqqında məlumat verdi.

Gələcək planlardan danışan Seymur bəy Gəncə şəhərində xüsusi tədbirlərin həyata keçiriləcəyini bildirdi: “Dövlətçilik əleyhinə olan bir sıra dini və siyasi qüvvələr gənclərin sosial durumunun zəifliyindən istifadə edərək onları yalnış istiqamətlərə yönləndirməklə çirkin siyasətlərini həyata keçirirlər. Bu kimi millət və dövlət düşmənlərinə ən doğru cavab milli-vətənpərvərlik şüurunun formalaşdırılmasıdır ki, bunun Gəncə şəhərində də inkişaf etdirilməsi lazım. Təşkilat olaraq bizim Gəncə ilə bağlı xüsusi proqramımız tərtib olunur. Dövlətimizin dəstəyi və bizim çalışmalarımızla inanırıq ki, ən qısa zamanda Bakıda olduğu kimi Gəncədə də böyük işlər həyata keçirəcəyik”.



Səfərdə DAK Gənclər Təşkilatının İdarə Heyətinin üzvləri Əfqan Həsənov, Orxan Əlirzayev, üzvləri Çingiz Qəribov, Eşqin Veyisov, Nəriman Əliyev də iştirak etmişdir. Görüşə Gəncədən fəal xanımlardan Ruhəngiz Hacıyeva, Əsmər Əkbərli, Ülkər Vəliyeva, Zərbəyim Hacıyeva, Gəncə Media Mərkəzindən Aytən Ələkbərova, gənc türkoloq Seymur Yusifbəyli və s. kimi dəyərli gənclər qatılmışdı.



Bundan başqa, Reallıq qəzetinin təsisçisi və baş redaktoru İkram Rafiqoğlu ilə görüş oldu. Seymur bəy təşkilatın həyata keçirdiyi işləri təqdim etdikdən sonra İkram bəy belə bir təşkilatın Gəncədə fəaliyyətinin genişləndirilməsinin labüd olduğunu diqqətə çatdırdı. “Bu gün sizin kimi gənc ziyalıları gördükdə gələcəyə ümidim artır. Mən Gəncə üzrə bacardığım qədər sizə dəstək verməyə hazıram. Təşkilatın Gəncə ofisi üçün sizə yardımçı ola bilərəm”.



Daha sonra Azərbaycan Yazıçıar Birliyinin və Jurnalistlər Birliyinin üzvü Əlvan Kəbirli və Gəncə Dövlət Universitetinin dosenti Rəşid Məhərrəmli ilə də görüş olmuşdur. Görüş müddətində Bakıdan gətirilmiş müxtəlif kitablar və Yeni Nəfəs qəzetinin müxtəlif sayları təqdim olunmuş, müxtəlif siyasi proseslər müzakirə edilmişdir. Gənclərin təşəbbbüsü və çalışmaları ziyalılar tərəfindən yüksək qiymətləndirilmişdir.



Onu da bildirək ki, Seymur Həsənli və təşkilatın üzvü Eşqin Veyisov Gəncə Şəhər İcra Hakimiyyətinin nümayəndəsi Elçin Veyisov ilə də görüç keçirmidir. Görüş zamanı Gəncədə həyata keçiriləcək işlər, bu işin sistemi, İcra Hakimiyyətinin və digər dövlət strukturlarının dəstəyi kimi məsələlər müzakirə olunmuşdur.



Günel RƏHİMOVA