“Yeni Nəfəs” Gənclər Hərəkatı tərəfindən təşkil olunan “Bütöv Azərbaycan” məktəbinin növbəti dərsi Güney Azərbaycana həsr olunmuşdu. Məktəbin qonağı DAYAQ-ın rəhbəri, Güneydə davam edən milli hərəkatın fəal iştirakçılarından olan Sayman Aruz oldu.

Dərsi giriş sözü ilə açan “Yeni Nəfəs” Gənclər Hərəkatının sədri Mehman Həsən Güney Azərbaycanda baş verən proseslər haqqında qısa məlumat verdi. Daha sonra söz Sayman bəyə verildi.

Sayman bəy Güney Azərbaycandakı son hadisələr, Milli Hərəkatın vəziyyəti haqqında gənclərə bu hadisələrin şahidi olaraq bilgilər verdi. “ Biz oyanış mərhələsini keçmişik, indi ağılla hərəkət edərək dirəniş mərhələsini başa çatdırıb İstiqlala doğru yürüməliyik” –deyə o bildirdi. Güneydə və Quzeydəki insan haqlarının vəziyyətindən bəhs edən qonaq bu barədə var olan problemlərə toxunaraq, ilk əvvəl Güneydə ana dili və məktəb probleminin həllini vacib saydığını qeyd etdi.

“Biz təkcə ruhən deyil, həm də işdə, əməldə birləşməliyik”-deyən Sayman bəy Güneylə Quzey arasında sıx əlaqələrin qurulmasının tərəfdarı olduğunu vurğuladı. O, bu yükün gənclərin üzərində olduğunu, gec-tez bu bütövlüyün yaranacağını və bunun üçün həddindən artıq çalışmaq gərəkdiyini gənclərin diqqətinə çatdırdı.

Məktəb gənclərin iştirakı ilə diskussiya şəklində davam etdi.



Gülsüm CƏLİLSOY