17 aprel 2010-cu il tarixində Dünya Azərbaycanlıları Konqresinin mərkəzi ofisi İstiqlaliyyət 8 ünvanında Gənc Politoloqlar Birliyinin təsis konfransı keçirildi.

Konfransı giriş sözü ilə açan birliyin sədri Aqil Namazov ilk növbədə mənəvi dəstəyinə görə Dünya Azərbycanlıları Konqresi Gənclər Təşkilatı və onun sədri Seymur Həsənliyə öz təşəkürünü bildirib sözü ona verdi. Seymur Həsənli ilk növbədə gənc politoloqları təbrik etdi. Hər zaman tələbələrin yanında olacağını, bütün dəstəyini əsirgəməyəcəyini diqqətə çatdırdı. “Yeni Nəfəs+” qəzetində bir səhifə sizindir. Sırf öz nəzarətimizdə olan dörd saytda və əməkdaşlıq etdiyimiz ondan yuxarı saytda fəaliyyətiniz işıqlanacaq. Hazırda konfrans keçirdiyiniz ofis də sizin ixtiyarınızda. Çünki bu ofis məhz dövlətçiliyimizə xidmət üçün çalışır” Sonra Aqil Namzov Gənc Politoloqlar Birliyinin yaranmasını şərtləndirən amillərdən, onun fəaliyyətinin Azərbaycan gəncliyinin həyatına, dünyagörüşünə, siyasi mədəniyyətinə edəcəyi təsirdən bəhs etdi. Simral Mahmudov icraçı direktor kimi birlikdə gələcək fəaliyyəti,yerinə yetirəcəyi vəzifə haqqında məlumat verməklə yanaşı, həm də birliyin müstəqil Azərbaycan gəncinin siyasi fəaliyyətinin artmasında oynayacağı rolu vurğuladı. Konfransda həmçinin layihə icraçısı Səmra Hümbətova, təşkilatçı Şəbnəm Muradova, ictimai əlaqələr üzrə kordinator Dəyanət Abbaszadə və mətbuat katibi Səbinə Tağıyeva da çıxış etdilər.

Öz vəzifələri,birlikdə fəaliyyətləri haqqında danışan idarə heyəti birliyin məqsədi, amalı, gələcəyə dair planlarını açıqladı.

Bir qrup gənc tərəfindən yaradılmış Gənc Politoloqlar Birliyi dünyada və regionda, o cümlədən Azərbaycanda baş verən sosial-siyasi hadisələri təhlil etmək, qiymətləndirmək və proqnozlaşdırmaq istiqamətində fəaliyyət göstərəcək, gəncləri maarifləndirmək, onlarda politoloji vərdişləri formalaşdırmaq, bilikli və istedadlı gənclər arasında əlaqə yaratmaqla vasitəçilik funksiyasını həyata keçirəcəkdir.

Gələcəyə dair planlara gəlincə isə, konfransda qeyd edildi ki, birlik hər kəsə bərabər start imkanları yaradıldığı dövrdə demokratik prinsipləri rəhbər tutaraq gənclərin öz potensialını göstərməsi üçün şərait yaratmağı, onların siyasi proqnoz vermək qabiliyyətini inkişaf etdirməyi, siyasi debatlar, seminarlar, siyasi proseslərin müzakirəsini təşkil etməyi və bu tipli layihələri həyata keçirməyi nəzərdə tutur. Gənc Politoloqlar Birliyi fəaliyyət proqramında milli ideologiyanın təbliğinə, vətənpərvər, milli ruhlu gənclərin yetişdirilməsinə xüsusi önəm verir. Qloballaşmadan kənarda qalmadan bu prosesdə məhz özünəməxsus dəyərləri əsas götürərək tarixi keçmişimiz, dövlətçilik ənənələrimiz, mənəviyyatımız və milli mentalitetimizdən kənarlaşmadan öz inkişaf yolunda Azərbaycan dövlətinin və cəmiyyətinin reallıqlarını fikir süzgəcindən keçirir, gənclərdə liderlik və idarəetmə qabiliyyətini inkişaf etdirir, onları narahat edən problemləri özlərinin iştirakı ilə, eyni zamanda əlavə resurslar cəlb etmək yolu ilə həll edir.

İdarə heyəti, o cümlədən, bir qrup gəncin iştirakı ilə keçən təsis konfransında 24aprel tarixində “Qondarma erməni soyqırımı,ermənilərin soyqırım oyunu” mövzusu ilə bağlı müzakirələrin keçiriləcəyi də vurğulandı.

Səbinə TAĞIYEVA