Novruz Novruzov "Madrid prinsiplərinə kimi hansı mövqedən yanaşıb necə izah etməsindən və qavramasından gedir"



Müstəqil siyasi analitik Novruz Novruzovun Dünya Azərbaycanlıları Konqresi Strateji Araşdırmalar Mərkəzinə müsahibəsi:



-Novruz bəy, Yenilənmiş Madris prinsipləri Azərbaycan üçün nələr vəd edir?



-Əgər "yeniləşmə” haqda verilən məlumatlar yalnız deyilənlərdən ibarətdirsə, prinsip etibarilə əvvəlki variantdan elə bir fərqi yoxdur. Sadəcə, mətndə "13 kənd” ifadəsi yer alıb ki, bu da əsaslı bir əhəmiyyətə malik deyil. Yox, əgər mətnin ictimaiyyətə açıqlanmayan tərəfi varsa bu, başqa məsələdir. Amma güman etmirəm ki, mətndə nə isə böyük əhəmiyyətə malik gizli müddəalar yer alsın.



Qaldı ki, "yeniləşmə”nin Azərbaycana nə isə vəd etməsi, bu birmənalı şəkildə "yaxşı heç nədir”, hətta xarici işlər nazirimiz Azərbaycanın bunu müzakirə üçün qəbul etdiyini bildirsə də. Yəni, əslində söhbət Madrid prinsiplərinə kimi hansı mövqedən yanaşıb necə izah etməsindən və qavramasından gedir. Digər tərəfdən bunlar hamısı mənasız danışıqlar fonunda diplomatik gedişlər mahiyyəti daşıyır.



-ATƏT-ın PA prezidenti Yoao Suares Milli Məclisin üzvlərilə görüşündə belə bir açıqlama verdi ki, münaqişənin həllini beynəlxalq qurumlardan gözləmək düzgün deyil. O, açıq şəkildə bildirdi ki, münaqişənin həlli ilə məşğul olan qurumlar bu məsələdə acizdirlər. Belə olan halda nə etmək lazımdır?



-Avropa yetkilisi belə bir etirafa varmaqla, məncə, Azərbaycana manevr üçün yol açmaq istəyir. Təbii ki, onun fikirləri şəxsi deyildir və təmsil etdiyi qurumun mövqeyini əks etdirir. Gərək ki, almanlara məxsus olan bir məsəl var:”Fakt yaman tərs şeydir”. Yoao Suares də təkzibolunmaz faktı dilə gətirib. Bununla o, bəlkə də Avropa Azərbaycanı diplomatik hücuma təhrik edir. Demək, Azərbaycan tərəfi Qarabağ məsələsində aciz qalan və üstəlik ermənipərəst xəyallarından usanmayan, haqqı tapdalayan beynəlxalq qurumlara məsələnin silah gücünə həll olunması üçün məntiqi hücumlarını gücləndirməlidir.



Elnur Eltürk