№ 02/444 01fevral 2010-cu il

Mətbuat Xidmətinin

Məlumatı



Milli Qurtuluş Partiyası müxalifət liderlərinə müraciət ünvanladı



Partiya rəhbərliyi ölkə prezidentinin istefası ilə bağlı imza toplanması kampaniyasına start verilməsini təklif edir



MQP Siyasi Şurasının növbəti toplantısı keçirilib. Toplantıda ölkədəki siyasi durum, qarşıdan gələn parlament seçkiləri, ölkə başçısının Soçi görüşü və cari məsələlər ətrafında müzakirələr aparılıb. Müzakirə olunan məsələlər barədə məlumat verən MQP SŞ üzvü Azər Turan partiya rəhbərliyinin Milli Məclisə seçkilərdə iştirak edib-etməmək haqqında yekun qərara gələ bilmədiyi üçün bu məsələnin fevral ayının 14-ə planlaşdırılan MQP Böyük Məclisinin sessiyasında müzakirəyə çıxarılacağını söyləyib. Partiya funksionerinin sözlərinə görə, Siyasi Şura üzvləri Müsavat, AXCP, KXCP, Liberal, ACP, Azadlıq, AXP, ADP, Böyük Azərbaycan və Vətəndaş İttifaqı partiyalarının liderlərinə müraciət edərək, ölkədəki siyasi, iqtisadi, sosial, diplomatik böhranlara, baş alıb gedən korrupsiyaya, rüşvətxorluğa, işsizliyə, ədalətsiz məhkəmə qərarlarına, antidemokratik xarakterli addımlara, Qarabağ probleminin həll edilə bilinməməsinə, mənəvi-əxlaqi aşınma prosesinin geniş vüsət almasına, millətin siyasi iradəsinin 2003-cü ildən başlayaraq 4 seçkidə vəhşiliklə zorlanmasına tutduğu siyasi posta uyğun olaraq əsas cavabdeh şəxs kimi Azərbaycan Respublikasının prezidenti İlham Əliyevin istefası tələbi ilə imza toplanması kampaniyasına start vermək üçün bu qurumların əməkdaşlığa dəvət edilməsinə qərar verib. Müraciətdə deyilir:”10 il Heydər Əliyev, 7 ilə yaxındır ki, İlham Əliyev qarşıda duran taleyüklü məsələləri həll etmək haqqında xalq qarşısında vəd versələr də, bu problemlər nəinki həll edilməyib, əksinə daha da çıxılmaz duruma gətirilib. Elə vəziyyət yaradılıb ki, bütün istiqamətlər üzrə böhran dərinləşib və belə getsə, qədim tarixə malik xalqın bir hissəsi olan quzey Azərbaycan əhalisi tarix səhnəsindən silinmək təhlükəsi ilə üz-üzə qalacaq. Ölkə vətəndaşlarının etimadını itirən iqtidar qurduğu saxta və qeyri-demokratik rejim vasitəsilə öz hakimiyyətini qoruyur, bu yolda əzəli torpaqlarımızı belə düşmənə güzəştə getməyə hazırdır. MQP Siyasi Şurası ölkədə fəaliyyət göstərən sağlam müxalif qüvvələri, xüsusən də İsa Qəmbər, Əli Kərimli, Mirmahmud Mirəlioğlu, Lalə Şövkət, Rəsul Quliyev, Əhməd Oruc, Pənah Hüseyn, Sərdar Cəlaloğlu, Elşad Musayev və Əli Əliyevin başçılıq etdiyi qurumları tarixi məsuliyyəti üzərlərinə götürməyə, baş verənlərə əsas cavabdeh şəxs kimi Azərbaycan Respublikasının prezidenti İlham Əliyevin istefası tələbi ilə imza toplanması kampaniyasına start vermək üçün MQP ilə əməkdaşlığa dəvət edir”.

Mətbuat Xidmətinin

rəhbəri: Kənan Göytürk