Mətbuat Xidmətinin

Məlumatı



Ölkə üzrə orta məktəblərdən şəhid adları götürülür



Vüqar Bəyturan:”Bu qərarı verənlər şəhidlərin ruhuna edilən hörmətsizliyə görə cavab verəcək”



MQP başqanı Vüqar Bəyturan ölkənin bəzi orta məktəblərinə verilmiş şəhid adlarının geri alınması, həmin tədris ocaqlarında qoyulmuş xatirə lövhələrinin yığışdırılması prosesinin başlanması və bunun bütün orta məktəbləri əhatə edəcəyi barədə informasiya əldə etdiklərini bildirib. MQP lideri bu olayla bağlı xüsusi bəyanatla çıxış edib. Bəyanatda deyilir:” Baş verən hadisə tərəfimizdən pislənilir və millətimizin tarixinə, ərazi bütövlüyümüz uğrunda müharibədə verdiyimiz şəhidlərin ruhuna hörmətsizlikdir. Heydər Əliyevin adının əbədiləşdirilməsi istiqamətində hər gün verilən yeni sərəncamların fonunda şəhidlərimizə olan bu münasibətin səbəbləri barədə əlaqədar orqanlar izahat verməlidir. Biz ərazilərimizin hələ də işğal altında olduğu bir vaxtda vətən uğrunda döyüşmüş və şəhid olmuş qəhrəmanlara qarşı atılan bu addımın vətənpərvərlik ruhunun öldürülməsinə, millətimizin öz torpaqları uğrunda döyüşmək istəyinin qarşısının alınmasına xidmət etdiyini bəyan edirik. MQP bütün ölkə ictimaiyyətini və milli mənafeyə xidmət edən siyasi qüvvələri bu olaya etiraz etməyə çağırır. Əminik ki, bu qərarı verənlər mütləq tarix qarşısında əməllərinə görə cavab verəcək”.



Mətbuat Xidmətinin

rəhbəri: Kənan Göytürk