Hollandiya və Beynəlxalq Jurnalistlər Birliyinin üzvü, politoloq Vüqar Abbasovla müsahibə



- Vüqar bəy, bu gün Suriya və Türkiyə arasında nə baş verir? Sizcə, əslində məsələnin kökündə indiki proseslər dayanır, yoxsa bilmədiyimiz başqa məsələlər var?



- Suriya ilə Türkiyənin arasında baş verənlərə tək bu günün prizmasından baxmağı düzgün hesab etmirəm. Suriya hər vaxt PKK çıların həm təlim yerləri, həm də ən çox istifadə etdikləri ölkələrdən biri olub. Bundan əlavə Suriya PKK – ın silahla təmin olunmasında da önəmli rol oynayıb, Rusiya bu terrorçu təşkilatı daha çox Suriya üzərindən silahlandırıb. Rusiyanın beynəlxalq arenada Suriyaya dəstək verməsi də təsadüfi deyil. Qısası, bu gün Türkiyə və Suriya arasında baş verənlər tək Ankaranın Bəşər Əsəd rejminə olan münasibətin göstəricisi yox, Bəşər Əsədin və ondan öncə isə atası Hafiz Əsədin Türkiyəyə göstərmiş olduqları münasibətin göstəricisidir. Demək istəyirəm ki, Əsəd rejimi heç vaxt Türkiyəyə dost münasibətində olmayıb. İndi də rəsmi Ankaranın Əsəd rejmini haqlı olaraq, yumşaq desək, müdafiə etməməsi, bu gün baş verənlərin səbəblərindən biridir.



- Bu, bəlkə bu təxribatçı qüvvələrin işidir ki, Türkiyə Suriya müdaxilə etsin, buda nəticə etibarilə Ankaranın başı ora qarşısın. Üstəlik, bu geopolitik güclərin hesablanan oyunun tərkib hissəsi ola bilərmi?



- Təbii ki, Türkiyənin Suriyaya müdaxilə etməsini istəyən qüvvələr var. Qərbin maraqlarına da bu uyğun gəlir. Baş verənlər Türkiyə iqtidarı üçün heç də gözlənilməyən deyildi. Düşünürəm ki, Türkiyə iqtidarı öz ölkəsinin maraqlarına uyğun addımlar atacaq.



- Ümumiyyətlə, Türkiyənin Suriyaya hərbi müdaxilə etməsi haqda nə deyə bilərsiniz? Və əsasən də, bu hansı qüvvələrin marağına cavab verir?



- Düşünürəm ki, bu daha çox Qərbin maraqlarına uyğun olar. Artıq neşə vaxtdır ki, Qərb Suriya ilə bağlı planlarını həyata keçirtməkdə çətinlik çəkir. Bu isə öz növbəsində Qərb dövlətlərinin nüfuzuna xələl gətirir. Buna görə də Qər bütün gücü ilə Suriyaya müdaxilə etməyə maraqlıdır. Bunun üçün ən uyğun variant isə Türkiyədir. Təbii ki, Türkiyə atdığı addımları tək Qərbin deyil, eləcədə öz maraqlarına uyğun olaraq atır. Hadisələr bu cür davam edərsə, Türkiyə Suriyaya hərbi müdaxilə edə və bu isə öz növbəsində Əsəd rejminin çökməsini bir qədər də tezləşdirə bilər. Ancaq biz burda müharibənin törədə biləcəyi fəsadları da unutmamalıyıq.



- Necə düşünürsünüz, Bəşər Əsəd nə zamana kimi dirəniş göstərə biləcək?



- Əsədlər özləri də 1971 – ci ildə hakimiyyətə sakitliklə gəlməyiblər. Bu ailə uzun illərdir Suriyada hakimiyyətdədir və çox qırğınlar ediblər. Bunların isə bir sonu olmalıdır və bu son yaxınlaşır. Bəşər Əsəd getməlidir və gedəcək, bu qaçılmazdır. Tarixə baxsaq görərik ki, bu cür dirənişlər nəticə vermir. Əgər, Əsəd bu müxalifəti məhv etsə, bu o qədər də inandırıcı görsənmir, ortaya digər qüvvələr çıxacaq. Xalqın iradəsini heç bir silahla susdurmaq olmaz. Bəşər Əsəd də bunu bacarmayacaq. Məncə çox yaxın müddətdə bunun şahidi olacağıq.