Sinan Oğan: “TBMM-də Xocalı hadisələri soyqırımı kimi tanınarsa, bir daha Ermənistanın işğalçı dövlət olaraq mahiyyəti ortaya qoyulmuş olacaq”



Türkiyə parlamentinin deputatı, Türkiyə Strateji Araşdırmalar Mərkəzinin (TÜRKSAM) rəhbəri, tanınmış siyasi analitik Sinan Oğanla müsahibə



- Sizcə, Tükiyə Böyük Millət Məclisində Xocalı hadisələrinin soyqırım kimi, tanınmasını mümkün hesab edirsinizmi?



- Türkiyə Böyük Millət Məclisində Xocalı soyqırımın tanınması məclisdə səs çoxluğuna malik olan Ədalət və İnkişaf Partiyasının verəcəyi səsi ilə bağlıdır. Biz müxalifət partiyası olaraq, 26 Fevral tarixində Xocalıda həyata keçirilən dəhşətli və insanlıq tarixində acı bir səhifə olan bu hadisələrin Soyqırım Günü olaraq qəbul edilməsini istəyirik.

Ancaq nəzərə almaq lazımdır ki, Türkiyə Böyük Millət Məclisində qanunlar səs çoxluğu ilə qəbul olunur. Bu səs çoxluğu isə ancaq Ədalət və İnkişaf Partiyasının dəstəyi ilə mümkündür. Bu qanunla ortaya gətirməklə, bir daha AKP-nin bu hadisələrə hüquqi qiymət verilməsinə dəstək verib verməyəcəyini görəcəyik.



- Xocalı Soyqırımı Türkiyə Böyük Millət Məclisində tanınarsa, bunun Ermənistana nə kimi təsiri olacaq?



- Əgər, Türkiyə Böyük Millət Məclisində Xocalı hadisələri soyqırım olaraq tanınarsa, Ermənistanın beynəlxalq hüquq qarşısında cavab verməsi üçün hüquqi bazanın yaranmasına yol açılacaq. Ayrıca olaraq, bu qanun Ermənistan tərəfindən Xocalı daxil olmaqla Azərbaycanın digər torpaqlarını işğal etməsi faktoru bir daha onu işğalçı dövlət olduğu ortaya qoyulmuş olacaq. Bu isə işğalçı Ermənistanı beynəlxalq aləmdə çətin vəziyyətə sala və həmçinin, bu danışıqlar masasında Azərbaycanın mövqeylərinin güclənməsinə təsir edə bilər.



- Ümumiyyətlə, Xocalı Soyqırımını həyata keçirən cinayətkarların beynəlxalq hüquq qarşısında cəzalandırılması mümkündürmü?



- Yuxarıda da qeyd etdiyim kimi Xocalını soyqırım olaraq qəbul etdirmənin ən önəmli tərəfi bu cinayətdə iştirak etmiş olanların cəzalandırılması imkanıdır. Xocalıda soyqırım cinayəti edənlər tez və ya gec ədalət qarşısında cavab verməli olacaqlar.

Beynəlxalq ictimaiyyət bilməlidir ki, belə cinayətkarların azadlıqda qalması bəşəriyyət üçün təhlükədir və eyni zamanda bu cür hadisələrin yenidən baş verməsi üçün presedent ola bilər. Xüsusilə, onu bildirməliyəm ki, Xocalı soyqırımı insanlığa, bəşəriyyətə qarşı olan dəhşətli hadisəsidir.



Elnur Eltürk