№007/FV 10 oktyabr 2011-ci il







Mətbuat Xidmətinin



Məlumatı







Milli Qurtuluş Partiyası dövlət başçısına müraciət etdi







Vüqar Bəyturan:” Fransa ermənipərəst mövqeyinə görə, ATƏT-in Minsk Qrupundan kənarlaşdırılmalı, Sarkozinin Azərbaycana və Türkiyəyə girişinə yasaq qoyulmalıdır”







MQP Siyasi Şurasının növbəti toplantısı keçirilib. Toplantıda ölkədəki siyasi durum, siyasi məhbuslar problemi, Fransa prezidenti Nikola Sarkozinin Qafqaz səfəri, Güney Azərbaycanda son durum və partiyanın təşkilati məsələləri ətrafında fikir mübadiləsi aparılıb. Müzakirə olunmuş məsələlər barədə MQP başqanı Vüqar Bəyturan partiyanın Mətbuat Xidmətinə aşağıdakıları bildirib:” MQP Siyasi Şurası 2 aprel aksiyasında iştirak etdiklərinə görə həbs olunanların, başda Müsavat Partiyasının liderlərindən olan Arif Hacılı olmaqla, barələrində azadlıqdan məhrum edilmə haqqında verilən məhkəmə qərarlarını əsassız hesab edərək pisləyib, həbs olunanların təcili azadlığa buraxılmasını tələb edib. MQP Siyasi Şurası dövlət başçısı İlham Əliyevə müraciət unvanlayıb. Müraciətdə 18 oktyabr Müstəqillik Günü münasibətilə siyasi məsələlərlə bağlı həbs olunanların azadlığa buraxılması, müstəqillik uğrunda fəal mübarizədə xüsusi xidmətləri olan istiqlalçı deputatlara dövlət qayğısının göstərilməsi, siyasi sistemin inkişafı və təkmilləşdirilməsi üçün qeydiyyatdan keçmiş, faktiki fəaliyyət göstərən partiyaların dövlət büdcəsindən maliyyələşdirilməsi, onların qərərgahla təmin olunması, demokratik islahatlara başlanılması, ümummilli məsələ olan Qarabağ problemi ətrafında müzakirələr aparılması üçün siyasi partiyaların məşvərət toplantısının keçirilməsi dövlət başçısına təklif edilir. Biz bu addımların ölkədə kəskin siyasi qütbləşməni və qarşıdurmanı yumşalda biləcəyinə, xalqımızın qarşısında duran problemlərin həlli üçün hər bir vətəndaşın potensialının səfərbər ediləcəyinə ciddi təkan olacağını müraciətimizdə vurğulamışıq. Müraciətdə dövlət başçısı Güney Azərbaycanda baş verən proseslərə reaksiya verilməsinə, 35 milyonluq soydaşımıza qarşı fars molla rejiminin törətdiyi cinayətləri beynəlxalq müstəvidə müzakirəyə çıxarılmasına səy göstərməyə çağırış edilib. Sarkozinin Ermənistana və Gürcüstana tam dəstək bəyanatları ilə yanaşı Azərbaycana səfərində Şəhidlər Xiyabanını ziyarət etməməsi, səfər öncəsi Türkiyəyə qarşı təhdid bəyanatı ilə çıxış edərək, güya ilin sonuna kimi qardaş ölkənin uydurma erməni soyqırımını tanımayacağı təqdirdə, bu sözdə soyqırımını tanımayanların cinayət məsuliyyətinə cəlb olunacağı ilə bağlı Fransa qanunvericiliyinə əlavələr olunacağını deməsi MQP Siyasi Şurasında kəskin hiddət doğurub. Partiya rəhbərliyi Fransanın ermənipərəst mövqeyinə görə, ATƏT-in Minsk Qrupundan kənarlaşdırılmasının, Sarkozinin Azərbaycana və Türkiyəyə girişinə yasaq qoyulmasının vacibliyini qeyd edib”.



















Mətbuat Xidmətinin



rəhbəri: Kənan Göytürk