03 oktyabr 2011-ci il











MQP Siyasi Şurası Güney Azərbaycan türkləri ilə həmrəylik və dayanışma toplantısı keçirdi



Vüqar Bəyturan:”Ənənəvi müxalifət “Vikiliks”-də barəsində yazılanlardan nəticə çıxarmalıdır, bu sözləri mən yox, onların öz müttəfiq saydığı dairələr deyir”



MQP Siyasi Şurasının növbəti toplantısı keçirilib. Toplantıda ölkədəki ictimai-siyasi durum, Güney Azərbaycanda baş verən proseslər geniş müzakirə edilib. Müzakirə edilən məsələlər barədə MQP Mətbuat Xidmətinə açıqlama verən MQP başqanı Vüqar Bəyturan partiyanın Siyasi Şurasının 1oktyabr Güney Azərbaycan türkləri ilə dayanışma günü münasibətilə bəyanat qəbul etdiyini bildirib. Bəyanatda fars molla rejiminin Güney Azərbaycan türklərinə qarşı həyata keçirdiyi mənfur siyasətin son dövrlər daha da aktivləşməsi pislənilib, güney müxalifətinin 9 tələb adlı sənədinin qəbul edilməsi bu rejimdən tələb olunub, İbrahim Cəfərzadənin ailəsi ilə birlikdə qəzaya düşməsi və bir ailənin dünyasını faciəli şəkildə dəyişməsi təsadüfi qəza hesab edilməyərək, bu sui-qəsdi törədənin İran hakimiyyəti olması vurğulanıb. Daha sonra MQP SŞ-nın bəyanatında dünya ictimaiyyətindən və demokratik dövlətlərdən fars molla vəhşiliyinə dur deməsi istənilib, Quzey Azərbaycan dövlətinin siyasi rəhbərliyinin Urmu gölünün müdafiəsində susqunluğu qətiyyətlə pislənilib. Quzey Azərbaycan iqtidarının 2 aprel aksiyasında iştirak edən siyasi fəallara qarşı repressiya siyasətinə etiraz edən MQP SŞ hakimiyyətin qondarma ittihamlarla fərqli düşünənləri həbs etməsini siyasi zəiflik kimi qiymətləndirib, həbs olunanların təcili azadlığa buraxılmasını tələb edib. Vüqar Bəyturan MQP SŞ-da müxalifətin hazırki durumu ilə bağlı məruzə etdiyini, bu məruzədə “Vikiliks” saytında ənənəvi müxalifətin barəsində deyilmiş fikirlərin geniş təhlil olunduğunu da vurğulayıb: ”Ənənəvi müxalifət liderləri ABŞ-nın onlara qarşı olan bu münasibətindən nəticə çıxarmalı, xalqla işləməli, dar çərçivəli birliklərdən vaz keçib, bütün müxalifət qüvvələrini bir araya yığmaq istiqamətində təcili fəaliyyətə başlamalıdır. Nəzərə alsınlar ki, bu dəfə onları mən yox, özlərinə müttəfiq saydıqları dairələr tənqid edib”.



Mətbuat Xidmətinin



rəhbəri: Kənan Göytürk