Sentyabrın 3-də Güney Azərbaycanın bir sıra şəhərlərində İran hakimiyyətinin Urmiya gölünün qurudulmasına laqeyd münasibətinə qarşı aksiya keçirilib. Aksiya yerli vaxtla 18.00-dan etibarən ilkin olaraq Təbriz, Urmiya daha sonra isə Ərdəbil, Əhər və digər şəhərlərdə vüsət alıb. Aksiyalarda “Azərbaycan canımdır, Urmu gölü qanımdır!”, “Urmu gölü can verir, Məclis onun qətlinə fərman verir”, “Urmu gölü səslənir: “Susuzam, haray-haray” kimi şüarlar səsləndirilib.

Aksiyalara 10 minlərlə insanın qatıldığı bildirilir. Polislə nümayişçilər arasında iri miqyaslı toqquşmalar getdiyi və hətta Urmiyada mərkəzi meydanın ələ keçirildiyi də güneydən gələn xəbərlər sırasında yer alır. Yürüşçülərə qarşı İran polisi güc tətbiq edərək xeyli sayda soydaşımızı yaralamış, həbs etmişdir. Hətta həbs olunanlar sırasında uşaq və qadınların da olduğu qeyd olunur.

GünAz TV mətbuat mərkəzinin “Öyrənci” saytına istinadən yaydığı məlumata görə, Təbrizin Şəhnaz meydanında bir gənc soydaşımız təhlükəsizlik qüvvələri tərəfindən açılan atəş nəticəsində şəhid olub. Hadisə, etirazçılarla sivil məmurlar arasında qarşıdurma olan zaman baş verib.

İranın güc qüvvələri aksiyaçılara qarşı joplardan, gözyaşardıcı qazlardan, plastik mərmilərdən istifadə etmişdir. Yerli müşahidəçilərin məlumatına əsasən Təbrizdə Şahnaz xiyabanında dinc aksiyanın iştirakçısı olan 20-22 yaşlı bir gənc kişi öldürülmüşdür.

Güneyli soydaşlarımız aksiyaların təşkil olunduğu bölgələri informasiya blokadasında olduğunu qeyd edir. İnternet, telefon xidmətləri kəsilib.

Tehrandakı azərbaycanlılar «İmam Hüseyn» və «Azadlıq» meydanlarında aksiya keçirməyə çalışıb. Birbaşa əldə edilən məlumatlara əsasən, polis, çevik polis alayı, eləcə də inqilab keşikçiləri qvardiyasının əsas bazası sayılan bəsiclər, habelə tanınmayan bir sıra qüvvələr bütün şəhərlərdə keçirilən etiraz aksiyalara güc tətbiq edib. Hakimiyyətin aksiyanı yatıran çeşidli qüvvələri aksiyaçılara qarşı odlu silahdan da atəş açıb.

Çoxlu sayda tutulan və yaralananların olduğu bildirilib. Onların sayını hələlik dəqiqləşdirmək mümkün olmayıb. Aksiyaların bugün də davam edəcəyi gözlənilir.