№ 078 (520) 17 may 2011-ci il



Mətbuat Xidmətinin



Məlumatı







Milli Qurtuluş Partiyası Demokratiya Uğrunda İttifaqı tərk etdi







Vüqar Bəyturan:”Daha ciddi və ideoloji əsaslara dayanan fəaliyyət göstərmək qərarındayıq”



Bu gün Demokratiya Uğrunda İttifaqın Sədrlər Şurasının toplantısı keçirilib. Toplantıda MQP başqanı Vüqar Bəyturan bu qurumun sıralarını tərk etmək barədə partiyanın Siyasi Şurasının qərarını DUİ Sədrlər Şurasına təqdim edib. Geniş müzakirələrdən sonra DUİ SŞ MQP Siyasi Şurasının qərarına hörmətlə yanaşdığı və bu qərarın nəzərə alınması barədə qərar verib. MQP Siyasi Şurasının qərarını şərh edən Vüqar Bəyturan partiyasının 23 sentyabr 2009-cu ildə DUİ sıralarına qəbul edildiyini, bir müddət əvvəl isə KXCP və Böyük Azərbaycan partiyaları DUİ-ni buraxmaq qərarına gəldikdə Azadlıq Partiyası ilə bu qurumu yaşatmaq üçün razılığa gəldiklərini, sonradan daxildə bəzi fikir ayrılıqları, eləcə də MQP rəhbərliyində bu qurumla bağlı fərqli yanaşmalar olduğuna görə DUİ sıralarını tərk etmək qərarına gəldiklərini açıqlayıb. “Qurumun buraxılması ən optimal variant idi və Azadlıq Partiyası bunu qəbul etmədiyi üçün biz bu qurumda fəaliyyətimizə xitam verdik. Bundan sonra daha ciddi və ideoloji əsaslara dayanan fəaliyyət göstərmək qərarındayıq. Hələlik heç bir qurumda təmsil olunmaq qərarımız yoxdur, MQP rəhbərliyində “Bizim Azərbaycan” Blokunu bərpa etmək barədə təkliflər olsa da, bu istiqamətdə konkret mövqe müəyyənləşməyib. Hesab edirəm ki, bundan sonra əsas diqqətimiz təşkilatlanma və 2013-cü il prezident seçkilərinə hazırlığa yönələcək”-deyən MQP başqanı partiyanın 2012-ci ildə növbəti qurultayını keçirəcəklərini də bildirib.



Qeyd edək ki, DUİ-də hazırda dövlət qeydiyyatından keçmiş Azadlıq və qeydiyyatı olmayanAzad Azərbaycan Partiyası fəaliyyətlərini davam etdirir.







Mətbuat Xidmətinin



rəhbəri: Kənan Göytürk