DUİ 17 aprel aksiyasında polis zorakılığını pislədi







DUİ İctimai Palatanı inqilab imitasiyasına son qoymağa çağırdı















DUİ Sədrlər Şurasının növbəti toplantısı keçirilib. Toplantıda qərarların icra vəziyyəti, İctimai Palatanın 17 aprel tarixində keçirdiyi etiraz aksiyasında baş verən polis zorakılığı və həbslər, ölkədəki siyasi durum, DUİ-nin qarşısında duran vəzifələr və cari məsələlər müzakirə edilib.



DUİ Sədrlər Şurası hakimiyyətdən zorakılıq siyasətini, qoca, uşaq, qadın fərqi qoymadan dinc insanlara qəddarlığı dayandırmağı, qondarma cinayət işlərinə xitam verilməsini, şəhərin mərkəzində aksiyalar üçün müvafiq yerlər ayırmağı və real islahatlar aparmağı tələb edib. DUİ Sədrlər Şurası xəbərdarlıq edib ki, hakimiyyət belə hesab etməsin ki, İP-in etiraz aksiyalarını dağıtmatla cəmiyyətdəki narazılıqları aradan qaldırmaq mümkündür. 17 aprel aksiyası zamanı həbs edilənlərin təcili azadlığa buraxılmasını tələb edən DUİ Sədrlər Şurası İctimai Palatanın rəhbərliyini inqilabi imitasiya xarakteri daşıyan və xalqın mübarizə əzmini qırmağa hesablanmış qeyri-ciddi aksiyalara son qoymağa, milli demokratik düşərgə daxilində durumu bütün siyasi qüvvələrin iştirakı ilə dəyərləndirib, hakimiyyətlə mübarizəni görüntü məqsədli addımlarla deyil, düşünülmüş strategiya və taktika ilə aparmağa çağırıb. DUİ Sədrlər Şurası əks təqdirdə, Azərbaycanda demokratikləşmə fürsətinin əvvəlki proseslərdə olduğu kimi bu dəfə də əldən verilməsində son 18 il ərzində milli demokratik düşərgənin məğlubiyyətlərinə səbəb olmuş İP-dəki liderlərin məsuliyyət daşıyacağını bəyan edib.



Demokratiya Uğrunda İttifaq 2007-ci ildə təsis olunub. Quruma Azadlıq, Milli Qurtuluş və Azad Azərbaycan Partiyaları daxildir.







Mətbuat Xidmətinin rəhbəri: Rüfət Türkalp