Novruzum



Gönderen: Azər Həsrət. Tarih: 14 Mar 2011





Zərəngiz Dəmirçi Qayalı



Qədəmin mübarək, Novruzum!

Nə qüssə, nə qəm çək, Novruzum!

Başında çələng var al-əlvan,

Səninlə oyanır bu cahan!

Dumduru suların axanda,

Göylərdə şimşəyin çaxanda,

Yamyaşıl otların silkinər,

Gülərsən göy gülər, yer gülər!

Sən bahar qızısan, Novruzum!

Torpağın nazısan, Novruzum!

Al rəngin yaşıla qarışar,

Sən gəlsən küsənlər barışar.

Nəfəsin səməni cücərdər,

Nemətə bürünər süfrələr.

Qoğalın günəşdir nimçədə,

Şamların sönməsin heç vədə!

Şirinin, şəkərin, noğulun,

Söylənər əfsanən, nağılın,

Yumurtan bəzənər rəngbərəng,

Tonqalın şimşəklə həmahəng!

Şəninə şərbətlər içilər,

Körpənə köynəklər biçilər.

Güllü don geyinər gözəllər,

Qədrini el bilər, gün bilər!

İgidlər “Qaytağı” oynayar,

Sellərin, suların qaynayar!

Silinər qəlblərin ağrısı,

Parıldar köhlənlər sağrısı,

Torpağın, güllərin, otların,

Bu gözəl sevimli baharın,

Könüllər vəsfinə söz qoşar,

Nəğməli suların gurlaşar.

Gün vürub, daşların qızanda,

Plovun dəm alar qazanda.

Ən əziz müjdəsən yurduma,

Gəl əziz Novruzum,

Yenidən, bir də sən yurduma!







Çal Zülfiyyə (Aşıq Zülfiyyə İbadovaya itthaf edirəm)



Aşıq Zülfiyyə



Çal Zülfiyyə, daşan sellər coşa gəlsin,

Durna köçü buludlarla qoşa gəlsin,

Göldə silkinən sonalar xoşa gəlsin,

Çal, elimin aşıq qızı, nəğməni çal!

Ürəkləri titrədən bir “Dilqəmi”çal!



Məhsəti, Natəvan gələr sorağına,

Şah bülbülüm qonubsan Vətən bağına,

Zərnigarla Mahcur düşər fərağına,

Çal, elimin aşıq qızı, nəğməni çal!

Ürəkləri titrədən bir “Dilqəmi” çal!



Aşıq Pəri səni görsə oyanardı,

Dərdli Bəsti naləsindən dayanardı,

Dağlar, daşlar al laləyə boyanardı,

Çal, elimin aşıq qızı nəğməni çal,

Ürəkləri titrədən bir “Dilqəmi” çal!



Tanrı sənə gözəlliyi cəm veribdir,

Gözəl barmaq, gözəl nəfəs, can veribdir,

Tərif deyil, Xaliqi-Sübhan veribdir,

Çal, elimin aşıq qızı, nəğməni çal!

Ürəkləri titrədən bir “Dilqəmi” çal!



Vur mizrabı tərsalar da dinə gəlsin,

Sözün mehri, sazın mehri qana gəlsin,

Zərəngiz der, qoy ölənlər cana gəlsin,

Çal, elimin aşıq qızı, nəğməni çal,

Ürəkləri titrədən bir “Dlqəmi” çal!



Zərəngiz Dəmirçi Qayalı. Prezident mükafatçısı. 2 mart 2011-ci il.