DEMOKRATİYA UĞRUNDA İTTİFAQIN

MƏTBUAT XİDMƏTİNİN

MƏLUMATI



DUİ Sədrlər Şurası İsgəndər Həmidova qarşı təzyiqlərə son qoyulmasını tələb etdi



DUİ Sədrlər Şurasının növbəti toplantısı keçirilib. Toplantıda

qərarların icra vəziyyəti, ölkədəki ictimai-siyasi durum, qurumun

beynəlxalq əlaqələrinin qurulması və cari məsələlər müzakirə olunub.

Qərarların icra vəziyyətini qənaətbəxş hesab edən DUİ Sədrlər Şurası

Azərbaycan Liberal və Vətəndaş İttifaqı Partiyalarının ölkə

müxalifətinə birlik çağırışını təqdir etdiyini, qeyd olunan

istiqamətdə fəaliyyətə hazır olduğunu bildirib.

DUİ Sədrlər Şurası 28 fevral 1988-ci il tarixli Sumqayıt

hadisələrinin əsl günahkarlarının hələ də cəzalandırılmamasını

təəsüflə qeyd edib, həmin hadisələrdə günahı olmadığı halda

cəzalandırılanlara bəraət verilməsini və onların ailələrinə dövlət

tərəfindən kompensasiya ödənilməsini tələb edib.

DUİ Sədrlər Şurası Azərbaycanla Türkiyə Respublikaları arasında

viza rejiminin təcili aradan qaldırılmasının vacibliyini bəyan edib və

TRT -1 dövlət kanalında 26 fevral günündə Ermənistanla dostluğu təbliğ

edən proqramın yayınlanmasına, Xocalı soyqırımı ilə bağlı hər hansı

proqramın verilməməsinə təəsüfləndiyini bildirib.

DUİ Sədrlər Şurası ölkədə korrupsiya və rüşvət əleyhinə aparılan

kampaniyanın imitasiya xarakteri daşıdığını və köklü islahatların

aparılması zəruriliyini vurğulayıb.

DUİ Sədrlər Şurası keçmiş daxili işlər naziri İsgəndər Həmidova

qarşı təzyiqlərə son qoyulmasını və qohumu Kamran Şərifovun azadlığa

buraxılmasını tələb edib, hakimiyyətin fərqli düşünənləri, milli

demokratik düşərgənin liderlərini, millət tərəfindən sevilən milli

düşüncəli insanların təqib edilməsini pisləyib.

Demokratiya Uğrunda İttifaq 2007-ci ildə təsis olunub. Quruma

Azadlıq, Milli Qurtuluş və Azad Azərbaycan Partiyaları daxildir.



Mətbuat Xidmətinin rəhbəri: Rüfət Türkalp