Dünya Azərbaycanlıları Konqresi (DAK) Gənclər Təşkilatı “Səhər telekenalı zəhər yayır” adlı tədbir keçirdi. Çıxış edən DAK Gənclər Təşkilatının sədri Seymur Həsənli bildirdi ki, 12 ildir fəaliyyət göstərən “Səhər2” kanalı son proqramları ilə İran adlı ölkənin alt siyasətini açıq şəkildə ortaya qoyub. “Biz İran adlanan ölkədən və ona məxsus olan müxtəlif orqanlardan fərqli bir şey gözləmirik də. Sadəcə istəyimiz budur ki, Azərbaycan dövlətçiliyini və onun rəhbərliyini təhqir edən televiziyaya Azərbaycan ziyalılarının çıxarılmasının qarşısı alınsın. Onun Azərbaycan üzrə yayımına mümkün qədər məhdudiyyət qoyulsun.” DAK mətbuat xidmətinin rəhbəri Əlirza Amanbəyli isə Güney Azərbaycanda hər 8 saata bir adamı edam edən, 40 milyona yaxın Azərbaycan türkünə ana dili hüququ verməyən bir dövlətin hüquq anlayışından bəhs edərək müstəqil Azərbaycanın daxili işlərinə qarışmaq haqqının olmadığını bildirdi.

Daha sonra DAK Ağsaqqallar Şurasının sədri Babaxan Muradov, sədr müavini, professor Məhəmməd Teymurlu, Türküstan qəzetinin baş redaktoru Aqil Camal, “Sayokan” döyüş növləri mərkəzinin rəhbəri Vasif Namazlı, “Yeni Nəfəs” gənclər hərakatının sədri Mehman Həsən, “Borçalı Cəmiyyəti” gənclər təşkilatının sədri Alı Adıgözəl, şairə Mərcan Şahbuzlu çıxış edərək İranın antiazərbaycan siyasətinin mahiyyəti və ona qarşı atılmalı olan addımlar mövzusunda fikirlərini bildirdilər.

İran adlanan ölkənin “Səhər 2” telekanalının Azərbaycan dövləti əleyhinə təxribatları ilə bağlı ictimai rəyin formalaşması və ortaya qoyulması məqsədi daşıyan tədbirdə Azərbaycan Respublikası Prezident Administrasiyasına qeyd olunan telekanalın Azərbaycan üzrə yayımının dayandırılmasını, Azərbaycan vətəndaşlarının bu telekanala çıxış imkanlarının məhdudlaşdırılmasını və buna cavab olaraq milli televiziyalarımızın tezliyinin gücləndirilməsini nəzərdə tutan 500 imzalıq müraciət də iştirakçıların diqqətinə çatdırılmışdır.

Aysel ARAZ