Dünya Azərbaycanlıları Konqresi (DAK) Gənclər Təşkilatı “Qarabağ həsrəti” adlı ictimai müzakirə keçirdi. Tədbirin aparıcısı DAK GT İctimai Əlaqələr şöbəsinin rəhbəri ilk sözü təşkilatın sədri Seymur Həsənliyə verdi. O dedi ki, “Azərbaycan torpaqlarında yaradılan Ermənistan XX əsrin sonlarında yenidən Azərbaycana qarşı ərazi iddiası ilə çıxış edib. Bu işğal siyasəti 20 ildir davam edir və DAK GT 25-ə yaxın ictimai təşkilat rəhbərlərinin və nümayəndələrinin iştirakı ilə tədbir keçirib, yekdil münasibətin ortaya qoyulması niyyətindədir”. DAK mətbuat xidmətinin rəhbəri Əlirza Amanbəyli çıxışında Qarabağ probleminin həllində beynəlxalq təşkilatların fəaliyyətini tənqid etdi. Onun sözlərinə görə, Azərbaycan milli iradə nümayiş etdirərək, işğal olunan torpaqlarını azad edə bilər.

Qarabağ Azadlıq Təşkilatının sədri Akif Nağı Azərbaycan gənclərini düşmənə - ermənilərə nifrət ruhunda tərbiyə almasının vacibliyindən danışdı. A. Nağı dedi ki, Azərbaycan dünya ictimaiyyətinin mövqeyini nəzərə almadan, öz ərazilərini işğaldan azad etmək üçün hərbi əməliyyatlara başlamalıdır.

Sonra “Silahlı Qüvvələrə Demokratik Vətəndaş Nəzarəti Azərbaycan Mərkəzi” ictimai birliyinin sədri, mayor Ələkbər Məmmədov, “Azərbaycan Gənclərinin Avropa İnteqrasiya” təşkilatının sədri Gülsel Səfərova, “Məlhəm” Humanitar Qadınlar ictimai birliyinin sədri Xədicə İsgəndərli, “Yeddi Dövlət Bir Millət” konseyinin başqanı Azər Həsrət, “Gənclərin Elmi Mədəni İnkişaf” ictimai birliyinin sədri Sərdar Yusifoğlu, “Güney Azərbaycan Milli Oyanış Hərakatı”nın Quzey Azərbaycan nümayəndəliyinin sədri Ağrı Qaradağlı, “Bakı Strateji Araşdırmalar Mərkəzi”nin sədri Elnur Eltürk, “Yeni Nəfəs” gənclər hərakatının sədri Mehman Həsən, “Bütöv Azərbaycan Gənclər Təşkilatı”nın sədri Ruslan İzzətli, “Borçalı Cəmiyyəti” gənclər təşkilatının sədri Alı Adıgözəl, Azərbaycan Milli Demokrat Partiyası Gənclər Təşkilatının sədri Əşrəf Elatlı, “Dalğa” gənclər hərəkatının sədri Orxan Nəbiyev, “Valideyn Himayəsindən Məhrum Olmuş Uşaqlara Dayaq” ictimai birliyinin sədri Röyal Cəbiyev, NATO Əməkdaşlıq İnstitunun təmsilçisi Zahid Bayramov, “Gənclər Klubu” ictimai birliyinin nümayəndəsi Aytac İmanova və s. bu kimi təşkilat rəhbərlərinin çıxışı və iştirakı ilə reallaşmış tədbir gərgin və maraqlı müzakirələrlə yekunlaşdı.

Tədbirdə 25-ə yaxın ictimai təşkilatın adından Azərbaycan Prezident Administrasiyasına və beynəlxalq təşkilatlara müraciət qəbul olunub.

Orxan Əlirzayev







Müraciət

Biz, aşağıda adları çəkilən və sıralarında kifayət qədər üzvü birləşdirən ictimai qurumlar və fiziki şəxslər olaraq sizə bildirmək istəyirik ki, artıq Azərbaycan cəmiyyəti, işğala məruz qalmış Azərbaycan torpaqları ilə bağlı yekdil addımların atılmasını istəyir. Azərbaycan dövlətinin uğurlu siyasəti nəticəsində əksər dövlətlər və beynəlxalq təşkilatlar Azərbaycanın ərazi bütövlüyünü tanıyıb. Hətta BMT bu haqda dörd qətnamə qəbul etmişdir. İyirmi ilə yaxındır ki, torpaqlarımız işğal altındadır. Yəni Qarabağı gözü ilə görməyən artıq iyirmi yaşlı gənclərimiz yetişir. Onlar Qarabağ haqqında yalnız valideynlərindən eşitdiklərini və televiziyada gördüklərini bilir, bildiyi qədər də onu yaşayır.

Bu ədalətsizliyə, haqsızlığa son qoyulmalıdır. Əgər hər hansı bir dövlətin öz təhlükəsizliyi naminə daxilində, hətta digər dövlətin ərazisində demokratiyanı bərpa etməyə hüququ çatırsa, niyə Azərbaycanın öz ərazisi çərçivəsində bu hüququ olmasın? Və ya bu hüququndan istifadə etməsin? Axı bu, bütün prinsiplər baxımından normal qəbul olunmalıdır.

Bütün bu ədalətsizliklərə görə biz belə qərara gəldik ki, Qarabağ probleminin faəliyyət istiqamətindən asılı olmayaraq bütün ictimai qurumların müzakirə müstəvisinə çıxaraq. Sizdən öz imkanlarınız daxilində mövzu ilə əlaqədar daha qətiyyətli və real addımların atılmasını xahiş və tələb edirik.