Türk Xalqlarının Ümumdünya Assambleyasının I vitse-prezidenti, Dünya Azərbaycanlıları Konqresi İdarə Heyətinin üzvü, akademik Yəhya Yusif Canıyarın (Yəhya Yusif oğlu Əliyev) “TURAN MÜBARİZİ” adlı işıq üzü görmüş kitabının Biləsuvar rayonunda təqdimat mərasimi keçirildi. Biləsuvar rayon İcra Hakimiyyətinin təşkilatçılığı ilə gerçəkləşən tədbir Milli Qəhrəman Mübariz İbrahimovun adını daşıdığı məktəb-litsey kompleksində İcra başçısının açılış nitqi ilə başladı. O, Mübariz İbrahimova ən böyük qiymətin Cənab prezident İlham Əliyev tərəfindən verildiyini vurğulayaraq bu işdə hər kəsin səfərbər olmağını diqqətə çatdırdı. Sonra Bakıdan qonaq qismində iştirak edən millət vəkilləri – Aydın Mirzəzadə və Fəzail Ağamalı çıxış etdi. Onlar Mübarizin qəhrəmanlğını ifadə etmək üçün yeni sözlərin yaradılmasını bildirərək ona verilən qiymətdən məmnunluq hiss keçirdiklərini qeyd etdilər.

Bundan başqa tədbirdə BMT-nin mədəniyyət səfiri Elçin Rüstəmli, DAK İdarə Heyəti üzvü Ağalar Bayramov, DAK Ağsaqqallar şurasının sədr müavini Məhəmməd Teymurlu, “Məlhəm” Qadınlar İctimai Birliyinin sədri Xədicə İsgəndərli və s. dəyərli qonaqlar çıxış edərək Mübariz qəhrəmanlığının yatmış insanları oyatdığını, Azərbaycan xalqının ruhunun ölmədiyini diqqətə çatdırdılar. Tədbirdə həmçinin DAK mətbuat xidmətinin rəhbəri Əlirza Amanbəyli, DAK Gənclər Təşkilatının başqanı Seymur Həsənli və təşkilatın üzvləri iştirak edirdi. Sonra Şəhidin atası Ağakərim kişi çıxış edərək Mübarizin artıq onun deyil, Azərbaycanın oğlu olduğunu bildirdi.

Sonda Kitabın müəllifi Yəhya Yusif Canıyara söz verildi. O kitabın ərsəyə gəlməsindən danışaraq qeyd etdi ki, mübarizə davam edir. Bu möhtəşəm tədbir xatirə şəkillərinin çəkilməsi ilə sona çatdı.