Sinəmizdən vurulub, gözümüzdən batmışıq,

Xumarlanan fillərin qulağında yatmışıq,

Adına küçə verib, abidə ucaltmışıq –

...Gözlə, Xocalı, gözlə...



Bir məslək qulu deyil sözümüz, söhbətimiz,

Gözünü döyə - döyə dözəcək millətimiz...

Ha deyirik birləşək, tutmur məsləhətimiz –

Gözlə, Xocalı, gözlə...



Vəzifələr mübarək, işdah diş altındadır,

Əlimiz, ayağımız ağır daş altındadır.

Şuşa – Laçın düyünü deyən Daşaltıdadır –

Gözlə, Xocalı, gözlə...



Sökülüb tökülübdür çoxumuzun çuxası,

Çoxları kabinetin komendantı, koxası.

Əlimizə yetməyir bir xainin yaxası –

Gözlə, Xocalı, gözlə...



Hərə birtəhər çəkir evinin çax-çuxunu,

Adına ehsan verib yozmadayıq yuxunu.

Şəhidlərin ruhuna hələ yasin oxunur –

Gözlə, Xocalı, gözlə...



Başımda töhmətim var, başıma kül tökülmür,

Evim yıxılan eldə mənə çadır tikilmir.

“ATƏT”də, “BMT”də Şəhid adın çəkilmir –

Gözlə, Xocalı, gözlə...



Cəbrdən nə bilirik, cibdə üst-üstə gəldik,

Ötməyə, ötülməyə bir-birdən ötə gəldik.

Ümidim üzülməyib, bəlkə qeyrətə gəldik –

Gözlə, Xocalı, gözlə...



Adam var barmağına bircə tikan batmayıb,

Yuxulu vicdanını yuxudan oyatmayıb...

Dərdini danışmağa hələ növbən çatmayıb –

Gözlə, Xocalı, gözlə...



Tarın ürəyindəki nağarada çalınmaz,

Xəyanətlə verilən siyasətlə alınmaz,

Səbrini bas, qadası, hövsələn olsun bir az –

Gözlə, Xocalı, gözlə...



ƏLƏMDAR QULUZADƏ