Bu gün – 31 dekabr 2010-cu il, Dünya Azərbaycanlılarının Həmrəylik Günüdür. Yer üzündəki 50 milyondan çox Azərbaycan türkü bu günü özünün həmrəylik bayramı kimi qeyd edir. Hələ də geri zəkalı İran rejiminin işğalı altında yaşayan 35 milyon Azərbaycan türkü, 9 milyonu aşan Quzey Azərbaycan xalqı, Rusiya və başqa dünya dövlətlərinə səpələnmiş yurddaşlarımız üçün bu bayram birlik və bərabərlik rəmzidir. 21 il öncə – 1989-cu il dekabr ayının sonlarında Naxçıvanda bir qrup yurdsevər insanımız 200 ilə yaxın rus və fars işğalı altında qalan qandaşlarımızı bir-birinə qovuşdurmaq üçün sərhəd dirəklərinə od vurub tikanlı məftilləri qırdı. Bununla da Azərbaycanın Quzeyi ilə Güneyi arasında sərhədin ləğv edilməsi üçün ilk addımlar atıldı. Ümid vardı ki, ikiyə bölünmüş Azərbaycanın hər iki tərəfi azadlığa qovuşar və yüzillərin həsrətinə son qoyular. Məhz bu fikri diqqətə alan Azərbaycan Respublikası özünün müstəqilliyini elan etdikdən sonra məhz 31 dekabr gününü rəsmi bayram kimi qeyd eləməyə başladı.



31 dekabr rus və fars işğalı altında inləyən 50 milyonluq Azərbaycan türkünün azadlıq və bütövlük çabalarının bir daha dünyaya duyurulması üçün bir cəhddir! Bu gün Azərbaycan xalqının şərəf tarixidir! Bu gün Azərbaycan türkünün birliyinin rəmzidir! Bu gün bütün türk dünyası üçün bayramdır! Çünki Azərbaycan bütövləşmədən türk birliyi, Turan ülkümüz də əlçatmaz olaraq qalacaq!



Əziz soydaşlarımız! Yalquzaq.com və AzerHasret.com ailəsi olaraq sizin hər birinizi bu müqəddəs gün münasibətilə ürəkdən təbrik edirik! Qoy bu həmrəylik günümüz uca millətimizin istiqlal mücadiləsinin Azərbaycanı bütövləşdirəcək sonuclara varmasına nədən olsun! Qoy uca millətimiz ən qısa zamanda özünün bütövlüyünə qovuşsun! Bu arada Quzey Azərbaycanın bağımsızlığının banisi, ulu öndər Əbülfəz Elçibəyi də şükranla anaraq ona da “Bayramın qutlu olsun, Böyük Bəy!” deyirik!



Sayğı və salamlarla,

Azər Həsrət

Yalquzaq