№058/500 14 dekabr 2010-cu il

Mətbuat Xidmətinin

Məlumatı



Vüqar Bəyturan və MQP Siyasi Şurasının üzvləri ölkə vətəndaşlığından

imtina edə bilər



Vüqar Bəyturan(Oruc):”Saxta seçkilərə, təhdidlərə, təzyiqlərə və

siyasi fəaliyyət üçün normal şəraitin olmamasına etiraz etmək

formalarını müzakirə edirik”



Milli Qurtuluş Partiyasının başqanı Vüqar Bəyturan partiya

daxilində ölkədəki antidemokratik hakimiyyətə, saxta seçkilərə,

təhdidlərə, təzyiqlərə və siyasi fəaliyyət üçün normal şəraitin

olmamasına etiraz etmək formaları barədə müzakirələrin aparıldığını

bildirib. MQP liderinin sözlərinə görə, müxtəlif təkliflər var, ancaq

partiya rəhbərliyi konkret olaraq hansı təklifin üzərində dayanmaq

barədə yekun qərar qəbul etməyib. Vüqar Bəyturan deyib:“Təkliflərin

sırasında Demokratiya Uğrunda İttifaqa daxil olan 4 partiyanın

birləşib, ciddi siyasi gücə çevrilərək, aktiv mübarizə kursuna

keçməsidir. Digər təklif DUİ-dən ayrılaraq yenidən “Bizim Azərbaycan”

Blokunu müttəfiq partiyalarla bərpa etməkdir. Üçüncü təklif aclıq

aksiyaları, piketlər, analoqu olmayan başqa etiraz formaları- kütləvi

şəkildə ölkə vətəndaşlığından imtina kimi tədbirlərin həyata

keçirilməsidir. Son seçkilər bir məsələni sübut etdi ki, rejim

konfrantasiya mövqeyindən və saxtakarlıq, təhdid, təzyiq metodlarından

imtina etmək fikrində deyil. Ona görə, MQP Siyasi Şurası dünya

ictimaiyyətinin diqqətini ölkədə baş verən eybəcər proseslərə cəlb

etmək üçün yollar axtarır. Dünən 7 nəfərlik Hüquq Müdafiəsi Komitəsi

də yaratmışıq ki, hər hansı təzyiq olsa, operativ addımlar atmaq

mümkün olsun. HMK-yə rəhbərlik hüquqşunas, MQP başqanının siyasi

məsələlər üzrə müavini Xaqani Eminə həvalə olunub”.



Mətbuat Xidmətinin

rəhbəri: Kənan Göytürk