Nümayişdə tele-radio şirkətinin Qarabağla bağlı məlumatları təhrif etdiyi bildirilib

Dünyanın müxtəlif ölkələrindən toplaşmış azərbaycanlılar bu gün Londonda BBC tele-radio şirkətinin qarşısında etiraz aksiyası keçirib. ANS-in Londona ezam edilmiş xüsusi müxbirinin verdiyi məlumata görə, nümayişdə 100-dən çox azərbaycanlı iştirak edib. İki saat davam edən aksiyanın “BBC”nin qarşısında keçirilməsində məqsəd bu şirkətin Dağlıq Qarabağ münaqişəsinin həlli ilə bağlı həqiqətləri düzgün işıqlandırmaması ilə bağlı olub.

Aksiya iştirakçılarının sözlərinə görə, bu şirkətdə ermənipərəsət insanlar çalışır. Onlar münaqişənin dəqiq və obyektiv işıqlandırılmasına mane olurlar.

Daha sonra qətnamə oxunub. Sənəddə BBC ilə yanaşı bütün Avropa mətbuatının Qarabağ münaqişəsinə biganə qalması pislənir. Dünya Azərbaycanlıları Konqresinin sədri Qulamrza Təbrizi həmin qətnaməni şirkət rəhbərliyinə təqdim edib. Q. Təbrizinin sözlərinə görə, sabah Londonda keçiriləcək DAK-ın qurultayında Dağlıq Qarabağ münaqişəsi prioritet məsələlərdən biri olacaq.

Xüsusi müxbir: Azər Məmmədov //Ans press//