Azərbaycanın Gürcüstandakı səfirliyi bu ölkədə yaşayan həmvətənlər və azərbaycanlı sahibkarlarla birgə müsəlmanların müqəddəs bayramı olan Qurban bayramı ilə əlaqədar bir sıra tədbirlər keçirib. Bu barədə səfirliyin çərşənbə axşamı yaydığı məlumatda deyilir.



Səfirliyin təşəbbüsü ilə mərasim Tbilisidə ümummilli lider Heydər Əliyevin büstü önünə gül qoyulması ilə başlayıb.



Bayrama toplaşanları təbrik edən səfir Namiq Əliyev vurğulayıb ki, Heydər Əliyevin hakimiyyətə qayıdışından sonra ölkədə müqəddəs bayramın qeyd olunması üçün bütün lazımi şərait yaradılıb və ümummilli liderin özü möminlərlə birgə bayram təntənələrində iştirak edib, eləcə də Məkkəni ziyarət edib.



Səfirliyin nümayəndələri Gürcüstan məscidlərində keçirilən bayram namazlarında da iştirak ediblər.



Daha sonra səfirliyin təşəbbüsü ilə azərbaycanlıların kompakt yaşadıqları regionlarda heyvanlar qurban kəsilib və onların əti ehtiyacı olan və aztəminatlı həmvətənlərimizə paylanılıb.