Məlum olduğu kimi Dünya Azərbaycanlıları Konqresi Gənclər Təşkilatının öncədən planlaşdırılan konfransı keçirildi. Konfransın keçirilməsində əsas məqsəd olaraq təşkilatın gənclərə və ümumi ictimaiyyətə hesabatı, onun strukturunun tam olaraq yeni sistemə keçməsi, 11-12 dekabrda DAK-ın Londonda keçiriləcək qurultayı və 2011-ci il mart ayına Türkiyənin başkəndi Ankarada planlaşdırılan I Böyük Turan qurultayına hazırlıqla bağlı məsələlər nəzərdə tutulmuşdur.

Hesabat xarakterli DAK Gənclər Təşkilatının başqanı Seymur Həsənli çıxış etdi. Öncə konfransın 20 noyabr Qarakənddə baş vermiş qanlı olayın gününə təsadüf etdiyindən bəhs edən Seymur bəy gənclərlə birlikdə hadisə nəticəsində həlak olmuş dövlət xadimlərimizi sükutla yad etdi. Sonra başqanlığı ilə fəaliyyət göstərən təşkilatın bir illik hesabatını səsləndirdi. (hesabatın virtual forması yaxın günlərdə yayımlanacaq) “Bizim fəaliyyətimiz göz önündə olub. İstər Ərgənəkon törəni, istər 28 May Konserti və bütün fəaliyyətlərimizin real nəticələri var. Bizim təşkilatın güc olduğunu qəbul etmək istəməyənlər müxtəlif oyunlar oyanamaq istəyir. Amma bunu dəfələrlə demişik ki, bizə ağıllı gənc millətçilər lazım, axmaq fanatiklər deyil. Ağıllı gənci qısa müddətə aldatmaq olar. Gec-tez o həqiqəti dərk edəcək. Axmaqlar isə bizə lazım deyil, bizim komandada elə gənclərə yer yoxdur. ”

Təşkilatın yeni nizamnaməsinin müəllifi və başqan yardımçısı Cəlil Məmmədov çıxış edərək yeni sistem haqqında gənclərə bilgi verdi. Rəhbəri olduğu Mərkəzi Nəzarət Təftiş Komissiyasının fəaliyyət prinsiplərini açıqladı. Onu da bildirdi ki, şöbələr şəklində fəaliyyət göstərəcək sistemdə şöbələrin sayına məhdudiyyət qoyulmayacaq və bu konkret real fəaliyyətə görə həyata keçiriləcək.

Daha sonra şöbələrin rəhbərləri elan olundu, hər şöbə rəhbəri fəaliyyət prinsiplərini açıqladı və müvafiq fəaliyyət istiqamətlərinə görə üzvlər şöbələr üzrə bölündü. Beləliklə şöbələr və onların başqanları aşağıdakı kimi elan olundu.

-İctimaiyyətlə əlaqələr- Hüseyin Günəşli

-Təşkilati məsələlər - Əfqan Həsənli

-Beynəlxalq əlaqələr – Könül Nuriyeva

- Təhsil və Mədəniyyət – Elşən Edilli

- Gənclər və Resurs – Mehman Həsən

- Mətbuat xidməti – Orxan Əlirzayev

Artıq gələn həftədən etibarən bütün şöbələr fəaliyyətinə başlayacaq. MNTK bütün şöbələrin fəaliyyətinə nəzarət edəcək. Fəaliyyətsiz və ya nizam qaydalarını pozan gənc təşkilatdan uzaqlaşdırılacaq.

Sonda gənclər çıxış edərək öz təkliflərini irəli sürdülər. Seymur Həsənli ümumi təşkilatın proqramının hazır olduğunu, şöbələrin isə ayrıca olaraq öz proqramları olacağını və buna görə hələ rastına gəlinməmiş daha böyük işlərin həyata keçiriləcəyini diqqətə çatdırdı.

TÜRKƏR