O`zA, Toshkent, 13.11.2010 – Poytaxtimizda “Yangi avlod-2010” respublika bolalar ijodiyoti festivalining yakuniy respublika bosqichi boshlandi.



“O’zbekiston madaniyati va san’ati forumi” jamg’armasi, “Kamalak” bolalar tashkiloti, O’zbekiston Respublikasi Xalq ta’limi vazirligi hamkorligida o’tkazilayotgan ushbu festivalda ijodiy bellashuvning Qoraqalpog’iston Respublikasi, viloyatlar va Toshkent shahar bosqichi g’oliblari ishtirok etmoqda.



Yoshlar iste’dodini kashf etish, ularning qobiliyatini yuzaga chiqarish uchun zarur barcha sharoit va imkoniyatlarni yaratish masalasi doimiy e’tiborda. Yurtimizning barcha hududlarida bolalar badiiy ijodiyot markazlari, musiqa va san’at maktablari, ma’rifiy muassasalarning barpo etilayotgani, mavjudlarining moddiy-texnik bazasi mustahkamlanayotgani o’g‘il-qizlar ma’naviyatini yuksaltirish, badiiy didi va dunyoqarashini tarbiyalash, san’atning maftunkor va betakror olamiga oshno etishdek ezgu maqsadlarga xizmat qilmoqda.



Bu yo’nalishda «O’zbekiston madaniyati va san’ati forumi» jamg’armasi va bir qator tashkilotlar, vazirlik va idoralar bilan hamkorlikda amalga oshirilayotgan ijodiy-ma’rifiy loyihalar, ko’rik-tanlovlarning o’rni va ahamiyati ayniqsa katta. Ana shunday yirik madaniy-ma’rifiy loyihalardan biri – «Yangi avlod» bolalar ijodiyoti festivalidir. Olti yoshdan o’n to’rt yoshgacha bo’lgan bolalar ishtirok etuvchi ushbu san’at festivali iqtidorli yoshlarni aniqlash, ularni har tomonlama qo’llab-quvvatlashda muhim ahamiyat kasb etmoqda.



Festivalda ishtirokchilar o’zlari qiziqqan yo’nalish bo’yicha mahoratini namoyish etadi.



“Yangi avlod-2010” bolalar ijodiyoti festivali sovrindorlarini taqdirlash va ular ishtirokidagi gala-konsert 17 noyabr kuni “Istiqlol” saroyida bo’lib o’tadi.