№053/495 10 noyabr 2010-cu il



Mətbuat Xidmətinin

Məlumatı

MQP lideri 31 saylı Suraxanı ikinci Dairə Seçki Komissiyasının sədrinə müraciət etdi



Vüqar Bəyturan (Vüqar Oruc) :”Baş verən saxtakarlığın başında siz dayanmısınız”



Vüqar Bəyturan (Vüqar Oruc) 31 saylı Suraxanı ikinci Dairə Seçki Komissiyasının sədri İmran İskəndərova müraciət ünvanlayıb. Müraciətdə deyilir:”Mən, 31 saylı Suraxanı ikinci Seçki Dairəsindən deputatlığa namizəd Vüqar Əlövsət oğlu Oruc(Vüqar Bəyturan) seçkiyə qatıldığım andan fərqli münasibətin şahidi olmuşam. Hüquqlarımın pozulması ilə bağlı dəfələrlə MSK-ya, sizə və digər instansiyalara şifahi və yazılı müraciətlər etmişəm. Xəbərdarlıq edərək, digər namizəd Fərəc İbrahim oğlu Quliyevin xeyrinə baş verən qanun pozuntularını nəzərinizə çatdırmışam. Hər dəfə partokratiya dövründən qalma ənənələrə uyğun qərarlarla şikayətlərim təmin olunmayıb. DSK tərəfindən F. Quliyev xüsusi simpatiya ilə qarşılandığı halda, digər namizədlər, xüsusilə də mən qərəzli münasibətə tuş olmuşam. İcra strukturlarının, o cümlədən Ənvər Quliyevin göstərişi ilə MKİS-lərin Fərəc Quliyevin təbliğatını aparması, təşviqat materiallarımım yararsız hala salınması, evlərə edilən zənglər, açıq şəkildə Quliyevin himayə olunması hallarına göz yummusunuz. Seçki günü isə mənim müşahidəçilərim müşahidə prosesinə yaxın buraxılmayıb, səlahiyyətli nümayəndəm Rüfət Əhmədzadə həbs edilərək, 33-cü Polis Bölməsinə aparılıb, müşahidəçim Akif Qarayev isə 1 saylı məntəqədən zorla uzaqlaşdırılıb. Bundan başqa, seçki qutuları əlil olmayan seçicilərin evlərinə aparılmış, müxtəlif ərazilərdə spirtli içki və pul paylanıb. Bakı şəhərində MKİS-ləri kurasiya edən Ənvər Quliyevin(namizəd Fərəc Quliyevin qohumu) göstərişi ilə MKİS işçiləri Fərəc Quliyevin müşahidəçi və vəkilləri kimi seçkidə iştirak edib, seçki günü evlərə gedərək, vətəndaşları məcburi seçkiyə gedib, Fərəc Quliyevə səs verməyə çağırıblar. Mənə səs verən seçicilər isə bəzi hallarda(21, 15 və digər məntəqələrdə) təzyiqlə üzləşib. Məntəqələrin qarşısında duran MKİS işçiləri seçkiyə gələnləri Fərəc Quliyevə səs verməyə çağırış edib.

Bütün bunlar sizin üçün yeni informasiya deyil, çünki baş verən saxtakarlığın başında siz dayanmısınız. Bu müraciəti qanunun tələblərinə uyğun olaraq, ilk növbədə sizə ünvanlayıram. Yenə də qanunun tələbinə uyğun şəkildə tədbir görməyinizi xahiş edirəm. Hərçənd bilirəm ki, yenə ənənəvi cavab verəcək, ədalətin bərpası istiqamətində deyil, saxtakarlığın ört-basdır edilməsi istiqamətində qərar verəcəksiniz. Mənim tələbim aldığım səslərin azaldılmasına gətirib çıxarmış əməlin-mənə verilmiş səslərin Fərəc Quliyevin hesabına sayılmasını araşdırmağınız, yenidən sayma prosesinə qərar verməyiniz və nəticələrin düzgün olmadığı barədə rəy çıxarmağınızdır. Ədalət bərpa olunmazsa, mən MSK-ya dairənin nəticələrinin ləğvi, təkrar seçkilərin keçirilməsi və müvafiq qurumlara isə saxtakarlıq edənlərin cəzalandırılması üçün müraciət edəcəyəm”.



Mətbuat Xidmətinin

rəhbəri: Kənan Göytürk