Bakı, AzerHasret.com, 31.10.2010 – 34 saylı Xətai II seçki dairəsindən deputatlığa namizəd Azər Həsrətə dəstək verənlərin sayı və coğrafiyası genişlənməkdədir. Xəbər verdiyimiz kimi bir sıra qeyri-hökumət təşkilatları, siyasi partiyalar və ayrı-ayrı ictimai xadimlərin dəstəyini alan Azər Həsrət həm də türk dünyasının hər tərəfindən dəstək görməkdədir. Bu gün aldığımız xəbərə görə, seçki günü yaxınlaşdıqca onun namizədliyi məsələsi daha da maraqla izlənilir və tərəfdarları həyəcanla Azər Həsrətin deputat seçiləcəyi anı gözləyir.



Azər Həsrətin seçki qərargahından verilən bilgiyə görə, Türkiyədən 21-ci dönəm Milliyyətçi Hərəkat Partiyası Afyon millət vəkili Müjdat Kayayerli də onun namizədliyini dəstəklədiyini bəyan edib. Müjdat bəy göndərdiyi xəbərdə bildirib ki, Azər Həsrətin çalışmalarını Türkiyədən maraq və diqqətlə izləməkdədirlər və onun deputat seçilməsindən türk dünyasının böyük fayda görəcəyinə əmindirlər.



Bu dəstəyi yüksək dəyərləndirən Azər Həsrət bildirib ki, xüsusən MHP-ni təmsil edən bir siyasətçidən bu cür dəstək almaqdan məmnunluq duyur: “Əslində yalnız Türkiyə deyil, türk dünyasının hər tərəfindən mənə dəstək məktubları gəlməkdədir. Bu da mənim türk dünyasının birliyi üçün çalışmalarıma verilən dəyərdən qaynaqlanır. Hazırda məni bir çox hallarda Azərbaycandakından qat-qat artıq şəkildə başqa türk dövlət və topluluqlarında tanıyır və dəyər verirlər. Ona görə də hər gün onlarla insan dəstəyini ifadə edir, millət vəkili seçilməyəcəyimi ağıllarından belə keçirmədiklərini bildirirlər. Bu cür dəstək məktubları Türkiyə ilə bərabər Bolqarıstan, Yunanıstan, Qazaxıstan, Qırğızıstan, Qaqauziya, Krım, Güney Azərbaycan və s. türk toplumlarından gəlir və mən sevinirəm ki, insanlar çalışmalarıma belə dəyər verirlər. Müjdat bəyin dəstəyi isə məhz Türkiyənin Milliyyətçi Hərəkat Partiyasına görə mənim üçün ayrıca önəm kəsb edir. Əlbəttə ki, Azərbaycan qanunları bu insanların ölkəmizə gəlib hər hansı bir formada mənim seçki kampaniyama qatılmasına izn vermədiyi üçün həm onlar, həm də mən üzülürəm. Ancaq görürəm ki, Azərbaycanın daxilində arxalandığım ictimai-siyasi kəsimlər kənardan dəstək olmadan belə mənə yetərincə yardım edə bilirlər”.