Bakı, AzerHasret.com, 28.10.2010 – 34 saylı Xətai II seçki dairəsindən deputatlığa namizəd Azər Həsrət öz seçki kampaniyası çərçivəsində daha bir neçə görüş keçirib və könüllülərdən ibarət qrupla qapı-qapı gəzməyə davam edir. Bütün görüş və təmaslardan razı qalan Azər Həsrət ən adi seçicinin belə fikirlərini dinləyərək ona səmimi şəkildə öz rəyini bildirir. Kampaniya çərçivəsində namizədə yönələn suallardan biri də onun seçildikdən sonra hansı siyasi qüvvə ilə işbirliyi edəcəyi barədə olur. Bu sualı ən önəmli suallardan hesab edən Azər Həsrət seçicilərə və bütün siyasi kəsimlərə mesaj xarakterli belə bir açıqlama ilə çıxış edib: “Bir müddət öncə özümün siyasi mənsubiyyətim məsələsinə aydınlıq gətirərək qeyd etmişdim ki, heç bir partiyaya və ya siyasi qrupa bağlı deyiləm. Bu gün də eyni xətt üzrə fəaliyyətimi davam etdirirəm. Mənim üçün ən önəmli şey dövlətimin və millətimin mənafeləridir. Bu məsələdə istənilən siyasi qüvvə ilə işbirliyi etməyə hazıram. Ancaq bu o demək deyil ki, dövlətçilik adı altında öz siyasi məqsədlərini gizlədən, hakimiyyəti zorla dəyişməyə yönəlik fəaliyyətləri olan qüvvələrlə də işbirliyi edə bilərəm. Bundan başqa, Azərbaycanı digər dövlətlərlə qarşı-qarşıya gətirəcək fəaliyyətlər də mənim üçün deyil. Əsas məsələ bugünkü tarazlaşdırılmış xarici siyasətə sədaqət və ölkə içində sabitliyin qorunmasına yönəlik çalışmalardır. Əgər bu məsələlərə zidd addım atılarsa mən onun qarşısında olacam. Qalan sahələrdə ümummilli maraqlar naminə istənilən partiya ilə, o cümlədən hakim Yeni Azərbaycan Partiyası ilə sıx münasibətdə olmaqdan çəkinən deyiləm”.







Öz deputatını özün seç!



Azər Həsrət deputat seçildikdən sonra çox fərqli fəaliyyət göstərəcəyini də deyib: “Bir qayda olaraq Milli Məclis üzvlərimiz yalnız verilən tapşırıqları yerinə yetirməklə işlərini bitmiş hesab edirlər. Halbuki mən, üzərimə qoyulan vəzifələri yerinə yetirməklə bərabər öz təşəbbüsümlə digər ölkələrin deputatları ilə birbaşa əlaqələr qurmaqla həmin ölkələrdə Azərbaycan adına lobbiçilik fəaliyyətlərini də gerçəkləşdirməyi düşünürəm. Əlavə olaraq qarşılıqlı informasiya mübadiləsinə üstünlük verəcəm. Ümumilikdə isə Milli Məclis üzvü kimi çox fərqli fəaliyyət göstərəcəm”.