Bakı, AzerHasret.com, 20.10.2010 – 34 saylı Xətai II seçki dairəsindən deputatlığa müstəqil namizəd Azər Həsrət seçicilərlə intensiv görüşlərini davam etdirməklə bərabər vəkillərini və müşahidəçiləri də təyin etməklə məşğuldur. Onun seçki qərargahından verilən bilgiyə görə, 34 saylı dairənin namizədi artıq bu gün altı nəfər vəkilini təyin edib. Vəkillərin hamısı öz sahəsinin tanınmış şəxsləri olmaqla bərabər ictimai rəydə xüsusi yeri və çəkisi olan insanlardır.



Qərargahdan verilən bilgidə deyilir ki, Azər Həsrətin seçki qərargahının rəisi, tanınmış alim və jurnalist, filologiya elmləri doktoru, Azərbaycan Jurnalistlər Birliyinin baş katibi və türk dünyası uzmanı Ramiz Əskər, Azərbaycan Texniki Universitetinin dosenti, elmlər namizədi, Azərbaycan Respublikası “Təhsil” Cəmiyyətinin sədri Nuqay Əliyev, EkoAlyans QHT-nın sədri Mənsurə Rəsulzadə, “Türküstan” qəzetinin baş redaktoru Aqil Camal, Jurnalist Araşdırmaları Mərkəzinin sədri Seymur Verdizadə, Kyokuşinkaykan İko Matsuşima Təşkilatında Yeniyetmələr və Gənclər üzrə Yığma Komandanın baş məşqçisi Mail Abdullayev vəkil təyin edilən ilk heyətə daxildir. Bu gün artıq onların təyinatı rəsmiləşib və vəkil edilmiş şəxs vəsiqələri verilib.



Vəkillərin təyinatı məsələsinə münasibət bildirən Azər Həsrət deyib ki, belə bir heyətlə işləmək onun üçün olduqca əlverişli və rahatdır: “Göründüyü kimi, vəkillərimiz arasında alimlər, ictimai xadimlər, jurnalistlər və idmançı var. Bu isə ona hesablanıb ki, hər kəsimdən olan insanlarla ayrı-ayrılıqda anlaşmaya vara bilək. Ümid edirəm ki, daha dörd vəkil və 33 müşahidəçini təyin etdikdən sonra rahat bir şəkildə seçki prosesini başa vurub dairənin deputatı seçilə biləcəyik. Öncə də bəyan etdiyim kimi bu dairə ərazisindəki insanlarla təmaslarım və ayrı-ayrı şəbəkələrimizin sakit bir şəkildə kampaniya aparması mütləq bizim qalib gələcəyimizə imkan yaradır”.