Bakı, AzerHasret.com, 14.09.2010 – 34 saylı Xətai II seçki dairəsindən Milli Məclis üzvlüyünə namizədliyi irəli sürülmüş Azər Həsrət sentyabrın 13-də Dairə Seçki Komissiyasından imza vərəqlərini alıb. Elə həmin gün namizədliyi irəli sürülmüş şəxsin Beynəlxalq Bankın Nizami Filialında (Əhmədli metrosunun yanı) hesabı açılıb.



Bu xəbəri Azər Həsrətin seçki qərargahından veriblər. Xəbərdə qeyd edilir ki, 13 sentyabrda günün 2-ci yarısında DSK-ya dəvət edilən namizədə Seçki Məcəlləsinə uyğun qaydada və müddət ərzində ərizəsinə baxıldığı haqqında bilgi içərən iclas protokolundan çıxarış da təqdim edilib.



Qərargahın məlumatında deyilir ki, imza toplama kampaniyasına sentyabrın 14-dən başlamağı nəzərdə tutan Azər Həsrətin komandası ən qısa zamanda bu prosesi başa vuraraq sənədləri DSK-ya təqdim etməyi planlaşdırır. 450 keçərli imza tələb olunduğu halda 500 imza toplamağı nəzərdə tutan qərargah üzvləri dairənin hər tərəfini əhatə etməyə çalışacaq.



Xatırladaq ki, Azər Həsrət namizədliyinin irəli sürülməsi haqqında bildirişi sentyabrın 8-də 34 saylı Xətai II seçki dairəsinin Dairə Seçki Komissiyasına təqdim edib. Həm də o, bu dairədən namizədliyi irəli sürülən ilk şəxsdir.



Azər Həsrətin seçki qərargahı isə tam tərkibdə sentyabrın 13-ü səhərdən fəaliyyətə başlayıb. Azərbaycan Jurnalistlər Birliyinin baş katibi, Dr. Ramiz Əskərin başçılığında fəaliyyət göstərən qərargah 33 əsas və 7 əlavə üzv olmaqla 40 nəfərlik tərkibdən ibarətdir. Qərargah üzvləri sırasında tanınmış media təmsilçiləri, ictimai xadimlər, incəsənət adamları, ətraf mühit və heyvan haqları qoruyucuları, insan haqları fəalları, gənclər və idman təşkilatlarının nümayəndələri var.



Verilən məlumata görə, qərargahın tərkibi haqqında bilgi içərən xəbər açıqlandıqdan dərhal sonra bir sıra şəxslər Azər Həsrətlə əlaqə saxlayaraq onun komandasına qoşulmaq istədiklərini bildiriblər. Bunu nəzərə alaraq yaxın günlərdə Azər Həsrətin seçki qərargahının tərkibini genişləndirmək məsələsi müzakirə edilir.