“Mübariz İbrahimovun meyitinin şəkillərinin internetdə yayılması bütün dünyaya sübut etdi ki, erməni tərəfini meyitin onlarda olmaması iddiaları yalandır”. Prof. Qulamrza Səbri Təbrizinin fəxri sədri olduğu Dünya Azərbaycanlıları Konqresinin Gənclər Təşkilatının sədri Seymur Həsənli “Media forum” saytına açıqlamasında belə deyib.

Avqustun əvvəllərində www.odnoklassniki.ru saytının Tehler Yan adlı erməni istifadəçisi 2010-cu il iyunun 18-dən 19-na keçən gecə cəbhə bölgəsində Ermənistan silahlı qüvvələrini böyük itkilərə məruz qoyub şəhid olan Milli Qəhrəman Mübariz İbrahimovun meyitinin şəkillərini yayıb və şərh hissəsində şəhidi təhqir edən fikirlər yazıb.

Prof. Qulamrza Səbri Təbrizinin fəxri sədri olduğu Dünya Azərbaycanlıları Konqresinin Gənclər Təşkilatı avqustun 31-də müraciət yayaraq bildirib ki, “Odnoklassniki.ru” sosial şəbəkəsində hər hansı bir şəxsin səhifəsindən yüz şikayət olarsa, həmin səhifə avtomatik bağlanır: “Lakin soydaşlarımızın 400-dən artıq şikayət etməsinə baxmayaraq səhifə bağlanmayıb. Əksinə, həmin ermənidən şikayət edən şəxslərin səhifələrinə müəyyən qadağalar tətbiq olunub”.

DAK-ın Gənclər Təşkilatı saytı birtərəfli yanaşmada qınayaraq azərbaycanlı istifadəçiləri həmin şəbəkəni boykot etməyə çağırıb.

Seymur Həsənli gənclərin imzasını toplayaraq Prezident Administrasiyasına müraciət olunacağını bildirib: “Odnoklassniki.ru” sosial şəbəkəsindəki soydaşlarımızın 400-dən artıq şikayət yollamasına baxmayaraq şəkilləri yayan erməninin səhifəsinin bağlanmaması, əksinə, həmin ermənidən şikayət edən şəxslərin səhifələrinə müəyyən qadağalar tətbiq olunması tərəfkeşlikdir. Ona görə biz bütün gənclərimizi şəbəkəni boykot etməyə çağırırıq. Sosial şəbəkənin özündə bununla bağlı informasiyanı yayıb hər kəsi bu haqsızlığa qarşı çıxmağa çağıracağıq. Gənclərimiz arasında imza toplayıb Prezident Administrasiyasına və digər dövlət orqanlarına müraciət edəcəyik ki, bütün bunlardan hamı məlumatlı olsun”