№025/467 25 iyun 2010-cu il

Mətbuat Xidmətinin

Məlumatı



Bakı Şəhər İcra Hakimiyyəti MQP-yə “yox” dedi



MQP Siyasi Şurası aksiyanı 3 iyul tarixinə təxirə saldı



Məlum olduğu kimi, Milli Qurtuluş Partiyası Bakı İcra Hakimiyyətinə 26 iyun tarixində Prezident Administrasiyası önündə azad seçki, blogerlərin azadlığı və mitinqlər üçün şəhərin mərkəzində yerlərin ayrılması tələbləri ilə etiraz aksiyası keçirməklə bağlı müraciət ünvanlamışdı. 23 iyun tarixində BŞİH İctimai təşkilatlar və siyasi partiyalarla iş şöbəsinin müdiri Zaur Ramazanovun imzası ilə MQP-nin müraciətinə cavab verilib. Cavab məktubunda deyilir ki, “Sərbəst toplaşmaq azadlığı haqqında” Qanunun 7-ci maddəsinin 1 və 4-cü hissələrinin müddəaları nəzərə alınaraq, aksiyanın PA önündə keçirilməsi məqsədəuyğun hesab olunmur və MQP-yə Binəqədi, Səbail, Xətai rayonlarında hakimiyyətin hər dəfə müxalifətə təklif etdiyi mitinq üçün əlverişli olmayan yerlər məsləhət görülür.

MQP Siyasi Şurası fövqəladə toplantı keçirərək BŞİH-in cavab məktubunu müzakirə edib. Geniş müzakirələrdən sonra 26 iyun tarixinin Silahlı Qüvvələr günü olması nəzərə alınmaqla, 26 iyun aksiyası təxirə salınıb. MQP SŞ bəyan edib ki, aksiyanı təxirə salmaq haqqında qərar BŞİH-in cavab məktubu əsasında qəbul edilməyib, partiya bayram günündə icazəsiz aksiya keçirməklə paytaxtda, xüsusilə də PA önündə qarşıdurma yaradılmasını məqsədəuyğun hesab etmir. MQP SŞ 3iyul tarixində Demokratiya Uğrunda İttifaqın Müsavat Partiyası ilə birlikdə keçirəcəyi eyni tələblər irəli sürülən aksiyasında iştirak etmək və 26 iyun aksiyasını məhz bu günə ertələmək qərarına gələrək, həmin gün etiraz aksiyasını müttəfiqlərin mitinqin yeri barədə qərarından asılı olmayaraq, məhz Prezident Administrasiyasının önündə gerçəkləşdirəcəklərini vurğulayıb.



Mətbuat Xidmətinin

rəhbəri: Kənan Göytürk