Bütöv Azərbaycan məktəbinin növbəti dərsi - “Qarabağ gerçəklikləri”

Yeni Nəfəs Gənclər Hərəkatının təşkil etdiyi “Azərbaycan məktəbi” layihəsinin eyni adlı təliminin növbəti, yəni üçüncü dərsi keçirildi. Mühazirə “Qarabağ gerçəklikləri” başlıqlı mövzuya həsr olunmuşdu.

Dünya Azərbaycanlıları Konqresinin mərkəzi ofisi İstiqlaliyyət 8 ünvanında keçirilən məktəbin bu dəfəki mühazirəçi qonağı I Qarabağ savaşının iştirakçısı, Bakı Dövlət Universitetinin Tarix fakultəsinin müəllimi, ermənilərin real tarixinə aid “Gəlmələr”, “Ermənilərin gerçək tarixi” və s. kitab və monoqrafiyaların müəllifi Atamoğlan Məmmədli oldu.

Yeni Nəfəs Gənclər Hərakatının sədri Mehman Həsən Qarabağın işğal olunması və baş verən son olaylar haqqında qısa məlumat verdikdən sonra sözü qonağa verdi.

Ermənilər və onların tarixi keçmişi, ərazimizə gəlmələri və buradakı məqsədyönlü fəaliyyətləri haqqında gənclərə dolğun məlumatlar verən Atamoğlan müəllim hələ 1895 ci ildən başlayaraq onların Azərbaycanda və Türkiyədə törətdikləri faciələrdən danışdı. “ Qarabağsız Azərbaycan yoxdur. Ona görə də bizə milli ruh lazım. O ruhu tezliklə özümüzə qaytarmalıyıq. Üstəlik milli ruhun daşıyıcısı bilməlidir ki, o dünyadakı ən dəyərli ranqa-rütbəyə sahibdir, onu qorumalıdır” –deyə o bildirdi.

Qonaq, həmçinin Türk insanının bu günkü aktual problemlərindən də bəhs edərək “Türk insanı qalib gəlmək üçün bugün genetik kodundakı hisi-pası təmizləməlidir. Yəni, milli kimliyinə-özlüyünə dönməlidir.”-deyə vurğuladı.

Atamoğlan müəllim mühazirənin sonunda “Heçkəsdən qorxmayan hərkəsdən qorxandan daha qüdrətlidir” –deyərək Azərbaycan Türk gəncliyinə qorxmaz, cəsarətli və milli ruh daşıyıcısı olmağı arzu etdiyini söylədi. Mühazirə qonağa ünvanlanan suallarla davam etdi.

Gülsüm CƏLİLSOY