Mark Toner: “Biz Dağlıq Qarabağın müstəqilliyini tanımırıq və tərəflərdən heç birini dəstəkləmirik”.







ABŞ Dövlət Departamenti Azərbaycan rəsmilərinin Birləşmiş Ştatların Dağlıq Qarabağ münaqişəsi ilə bağlı tutduğu mövqeyə dair tənqidlərinə münasibət bildirib. Dövlət Departamentinin mətbuat xidməti rəhbərinin müavini Mark Toner “Amerikanın səsi”nə müsahibəsində deyib ki, ABŞ Dağlıq Qarabağ münaqişəsinin nizamlanmasında heç kimin tərəfindən deyil. Onun sözlərinə görə, Vaşinqton ATƏT-in Minsk qrupunun vasitəçilik səylərini yüksək qiymətləndirir və dəstəkləyir.



Mark Toner Azərbaycanla ABŞ arasındakı münasibətlərdə soyuqluq yaranması barədə məlumatları təkzib edib. Onun sözlərinə görə, ABŞ ATƏT-in Minsk qrupunun həmsədri kimi Azərbaycan və Ermənistan arasında razılıq əsasında ümumi ortaq məxrəcin tapılmasına çalışır: “ABŞ Dağlıq Qarabağın müstəqilliyini tanımır. Biz tərəflərdən hər hansı birini yox, Minsk prosesini və münaqişənin dinc yolla həllini dəstəkləyirik”.



Xatırladaq ki Azərbaycan rəsmiləri ABŞ-ın Dağlıq Qarabağ münaqişəsi ilə bağlı tutduğu mövqeyindən narazılıqlarını ifadə ediblər. Prezident Administrasiyasının ictimai-siyasi şöbəsinin müdiri Əli Həsənov deyib ki, ABŞ isə Dağlıq Qarabağ probleminin həllinə ciddi səy göstərmədən Ermənistanı çətin vəziyyətdən çıxarmaq istəyir. O bildirib ki, Azərbaycan ABŞ-ın bu siyasətinə qarşı artıq adekvat addımlar atır: “Mən hesab edirəm ki, Azərbaycan artıq adekvat addımlar atıb. Bu görünür. Biz birtərəfli qaydada Azərbaycana normal, dost, tərəfdaş münasibət bəsləməyən ölkəyə nə üçün dost, tərəfdaş münasibəti bəsləməliyik? Bu anlamda Azərbaycan hakimiyyəti və ictimaiyyəti adekvat addımlar atmaqdadır, Dağlıq Qarabağ probleminin həlli ilə bağlı alternativ yollar axtarmaqdadır. ABŞ-ın Minsk Qrupunda təmsilçiliyinə qarşı artıq ictimai rəy formalaşır. Bu təmsilçilik Azərbaycana heç nə vermədi”./anspress/