2010-cu ilin 13 mart tarixində Azərbaycanın gerçəklərini təbliğ edən yeni elektron kitabxana fəaliyyətə başlamışdır. Yeni açılan saytda kütləvi informasiya vasitələrin təhlili, tarixi arxiv materiallar, şəkillər cərgəsi, videofakt və müsahibə bölməsi mövcuddur. MyAzerbaijan.ORG elektron kitabxananın fəaliyyətinin uğurlu olduğunu o fakt göstərir ki, martın 17-dən başlayaraq erməni xakerləri saytı məhv etməyə çalışır.

"Hücumlar əsasən gecə saatlarında baş verir, saytın proqram kodunda boşluq axtarıb tapa bilməyən erməni xakerləri artıq "Denial Of Service" üsulundan istifadə edərək serveri dayandırmağa çalışırlar. Son hücum martın 19 axşam saatlarında Ermənistan tərəfindən keçirilmişdir. Google axtarış sisteminin xəritə üzrə izləmə funksiyası hücum edənlərin yerləşdiyi məkanlarına qədər izləmək imkanı versə də, biz onlara heç cür təsir edə bilmərik" - bunu saytın yaradıcısı ACCESS şirkətinin direktoru Nail Vəliyev Bakı Strateji Araşdırmalar Mərkəzinə bildirmişdir.

Kitabxana materiallarının nə üçün rus dilində olduğu barədə sualımız bu cür cavablandırılmışdır:

"Əvvəlcədən Azərbaycan dilində qoyulan saytın təbliğat cəhətdən təsiri az olur, lakin hələ ki rus dilində olduğu üçün bizim videolar, mətnlər və s. Azərbaycana məxsus olmayan bir çox internet məkanlarında artıq yerləşdirildi.

O ki qalır başqa dil versiyalarına, təbii ki Azərbaycan və rus versiyaları hazırlanmaqdadır və aprel ayının sonunda yerləşdiriləcək. Qeyd etmək istərdim ki, bu tək layihəmiz deyil, həmçinin Karabakh.WS (Qarabağ dünən, bu gün, sabah) və Sumqayıt hadisələrilə əlaqəli iki saytın qoyulması gözlənilir. Fürsətdən istifadə edərək, düşüncəli gənclərimizi bu işə qoşulmağa çağırıram. Tərcümə, məlumat axtarışı, analitika və bir çox digər sahələrdə bizə yardımçı ola bilən soydaşların iştirakı bütün Azərbaycan üçün çox dəyərli olacaq. Bu hər bir Azərbaycan vətəndaşının saytıdır".