Güney Azərbayacanda milli oyanış və fars rejiminə dirəniş gücləndikcə soydaşlarımızın siyasi təşkilatlanma istiqamətində fəallığı da artır. Belə təşkilatlanmanın nümunələrindən biri də ötən gün elan olunan Güney Azərbaycan Demokrat Partiyası idi.

Dünya Azərbaycanlıları Konqresinin mərkəzi ofisi İstiqlaliyyət 8 ünvanında keçirilən tədbirdə partiyanın sözçüsü Mahmud Bilgin iştirakçılara və mətbuata partiyanın məramnaməsi haqqında geniş bilgi verdi.

Tədbir dövlət himninin oxunması ilə açıq elan olundu.

DAK Mətbuat xidmətinin rəhbəri Əlirza Amanbəyli iştirakçıları Türk Dünyası uğrunda qurban getmiş Şəhidlərimizi yad etmək üçün bir dəqiqəlik sayqı duruşuna dəvət etdi. Güney Azərbaycanda gedən proseslər haqqında məlumat verən Əlirza bəy təşkilatlanmanı əsas amil kimi irəli sürdü: “Baxmayaraq ki, güneydə təşkilatlanma açıq şəkildə həyata keçirilə bilmir. Çünki fars rejimi həmin təşkilat rəhbərlərini məhv etməklə milli prosesin qarşısını almaq istəyir.” Partiyanın sözçüsü Mahmud Bilgin Güneyin daxilində, xaricdə gedən proseslər və partiyanın məramnaməsi haqqında məruzə etdi. “Güneydə durum çox çətindir. Bizə məxsus əraziləri bir neçə əyalətə parçalamaqla bir çox şəhərləri fars şəhəri kimi yazırlar. Türk şəhərlərinə qarşı hər cəhətdən qərəzlilik hiss olunur. Dövlət büdcəsindən pul ayırmalarına nəzər salsaq bunu açıq-aydın görə bilərik. İran adlanan ölkə onsuz dağılacaq. Və açıq deməliyik ki, bu qansız olmayacaq. Quzey Azərbaycanı da proseslərə açıq müdaxilə etmədən arxamızda hiss etmək istəyirik. Çünki biz bir millətik. Nə olsun ki, 200 ildir parçalayıblar bizi? GADP olaraq bildiririk ki, biz hər kəsin haqqını taniyacağıq. Amma güc mərkəzi Türk milləti olacaq. Necə ki, Quzeydə belədir. Buna görə də Nizamnaməmizdə hər şeyi açıq yazmışıq.”

Sonra DAK Qadınlar Şurasının sədri Dünyaxanım Əliyeva, DAK gənclər Təşkilatının sədri Seymur Həsənli, sədr müavini Nərmin Məmmədli, GAMOH-un Bakı Nümayəndəliyinin rəhbəri Ağrı Qaradağlı və digər iştirakçılar müxtəlif çıxışlar edərək GADP-nin yaranması münasibətilə Mahmud Bilgini təbrik etdilər.



QEYD: GADP idarə heyyətinin qərariilə Əlirza Amanbəyli GADP-nin Quzey Azərbaycan üzrə sözçüsü təyin olundu.



DAK mətbuat xidməti