Martın 5-də Azərbaycan prezidenti İlham Əliyev Türkiyə prezidenti Abdullah Gülə zəng edib. Telefon söhbətində İlham Əliyev ABŞ Konqresinin Nümayəndələr palatasının xarici əlaqələr komitəsində qəbul edilmiş qərarla bağlı etirazını ifadə edib, qərarı pisləyib. İlham Əliyev bunu ədalətsiz, tarixi həqiqətləri təhrif edən, bölgədə gərginliyin artmasına xidmət edə biləcək bir qərar kimi qiymətləndirib. O, deyib ki, Azərbaycan həmişə olduğu kimi Türkiyənin yanındadır və Türkiyəyə tam dəstək verməkdə davam edəcək. Türkiyə prezidenti də həmkarına bu mövqeyinə görə təşəkkür edib. Prezidentin mətbuat xidmətindən yayılan məlumata görə prezidentlər telefon söhbətində ikitərəfli münasibətlər və bölgədəki vəziyyətlə bağlı da fikir mübadiləsi aparıblar.

***

Milli Məclis etiraz müraciəti qəbul edib

Martın 5-də Azərbaycan Milli Məclisində (MM) ABŞ Konqresi Nümayəndələr Palatasının Xarici Əlaqələr Komitəsinin erməni soyqırımı iddiaları ilə bağlı qəbul etdiyi qətnaməyə etiraz müraciəti qəbul olunub.Sənədi MM-ə məsələ ilə bağlı yaradılan İşçi Qrupun sədri, parlamentin Beynəlxalq münasibətlər komitəsinin sədri Səməd Seyidov təqdim edib. Müraciətdə ABŞ Konqresinin komitəsində belə bir qərarın qəbul olunmasının ədalətsiz olduğu vurğulanıb. Azərbaycan torpaqlarının Ermənistan tərəfindən işğalı faktı diqqətə çatdırılıb və soyqırımı iddialarını araşdırmağın tarixin işi olduğu qeyd edilib.