Mətbuat Xidmətinin

Məlumatı



MQP Naxçıvanın müstəqilləşdirilməsi istiqamətində addımları qınadı



Vüqar Bəyturan:”Qarabağın gələcək statusu üçün presedent yaratmaq istəyinin arxasında etnik separatçılıq maraqları dayanır”



MQP Siyasi Şurasının növbəti toplantısı keçirilib. Toplantıda ölkədəki siyasi durum, Milli Məclisin Naxçıvan Muxtar Respublikasının hüquq və səlahiyyətlərinin genişləndirilməsi haqqında qəbul etdiyi dəyişikliklər, qardaş Türkiyə Respublikasında baş verən son hadisələr və cari məsələlər ətrafında müzakirələr aparılıb. Müzakirə olunan məsələlər barədə məlumat verən MQP başqanı Vüqar Bəyturan partiya rəhbərliyinin Naxçıvan Muxtar Respublikasının rəhbərliyinə əlavə səlahiyyətlər verilməsi istiqamətində bu qurum haqqında qanuna edilən dəyişiklikləri dövlətçilik prinsiplərinə zidd, milli mənafeyə uyğun olmayan, Azərbaycan Respublikasının ərazi bütövlüyünə vurulan növbəti zərbə kimi qiymətləndirildiyini bildirib. “Biz belə hesab edirik ki, hakimiyyətin erməni separatçılarına yüksək status vermək üçün presedent yaratmaq məqsədilə atdığı son addımların arxasında etnik separatçılıq maraqları dayanır, bu cür qərarlar ölkə Konsititusiyasına zidd olmaqla yanaşı, Azərbaycanın öz bir parçası üzərində suveren hüqüqlardan məhrum edilməsi planının tərkib hissəsidir”-deyən Vüqar Bəyturan edilən dəyişiklərin Konstitusiya Məhkəməsi tərəfindən ləğv olunması istiqamətində mübarizə aparacaqlarını qeyd edib.

Qardaş Türkiyə Respublikasında baş verən son hadisələrdən xüsusi narahatçılıq ifadə edən MQP Siyasi Şurası AKP iqtidarının antimilli fəaliyyətini bir daha pisləyib, həbs edilən hərbçilərin azad olunmasını və Atatürk prinsiplərinə yönələn hücumlara son qoyulmasını tələb edib.

MQP başqanının sözlərinə görə, toplantıda partiyanın DUİ-də fəaliyyəti, müxalifət daxilində gedən proseslər və MQP-nin gənclər təşkilatının gücləndirilməsi barədə müzakirələr aparılıb, müvafiq qərarlar qəbul olunub.



Mətbuat Xidmətinin

rəhbəri: Kənan Göytürk