Azərbaycan Xalq Cümhuriyyətinin qurucusu Məhəmməd Əmin Rəsulzadənin doğumunun 126-cı ildönümü münasibətilə gənclər öndərin Novxanıda qoyulmuş büstünü ziyarət etdilər.

Öncədən qeyd olunduğu kimi ziyarət yalnız Rəsulzadəçi gənclərin ziyarəti adı ilə keçirildi. Ancaq hər kəsə bilgi verilməsinə baxmayaraq ziyarətə cəmi iki təşkilatın nümayəndələri qatılmaqla dəstək verdilər.

İki saata qədər davam edən ziyarət zamanı gənclər Rəsulzadə ilə bağlı çıxışlar etdilər. Tədbiri açıq elan edən Hüseyn Günəşli ilk sözü Seymur Həsənliyə verdi. Seymur Həsənli Rəsulzadənin dərindən araşdırılmasının onun siyasi, iqtisadi konsepsiyasının, ümumilikdə Rəsulzadə düşüncəsinin öyrənilməsinin rəsmi səviyyədə tətbiqindən danışdı. “Rəsulzadə hər hansı bir partiyanın lideri deyil, çünki o bizə partiya deyil, Azərbaycan miras qoyub”. Sonra söz alan gənclər Rəsulzadənin daha geniş ölçüdə təbliğ olunmasını lazım olduğunu bildirdilər.

Çox təəssüf olsun ki, öncədən hər kəsə bilgi verilməsinə baxmayaraq, bir sıra özlərini millətçi adlandıran gənclər təşkilatları ziyarətə qatılmadılar. Halbuki, on gün öncə qeyd olunmuşdu ki, ziyarətdə heç bir təşkilatın adı hallanmayacaq. Bu gün bizə özünün qeyd etdiyi kimi yoxdan bir bayraq yaradan və bütün ömrünü Azərbaycan uğrunda mücadilə aparmaqla hər bir gəncimizə örnəyə çevrilən Rəsulzadəni ziyarət etməyənləri necə millətçi adlandırmaq olar?